پنجاب انفارمیشن ٹیکنالوجی بورڈ نے ڈیجیٹل مہارتوں کے فروغ کیلئے فاسٹ-نیوکس کے ساتھ مفاہمتی یادداشت پر دستخط کر دیئے ہیں، جس کے تحت طلبہ اور اساتذہ عالمی معیار کی آئی ٹی ٹریننگ اور سرٹیفکیشن حاصل کر سکیں گے۔یہ معاہدہ پی آئی ٹی بی کے اسکلز ڈویلپمنٹ ونگ کے ڈائریکٹر احمد اسلام سیان اور فاسٹ-نیوکس کے ریکٹر ڈاکٹر آفتاب معروف کے درمیان طے پایا، اس پروگرام کے تحت شرکا کو بین الاقوامی طور پر تسلیم شدہ سرٹیفکیٹ حاصل کرنے کا موقع فراہم کیا جائے گا۔ پی آئی ٹی بی اپنے آن لائن پورٹل کے ذریعے سرٹیفکیشن فیس کا 100 فیصد خرچ واپس کرے گا، حکام کے مطابق یہ اقدام تعلیمی اور مالی دونوں رکاوٹیں ختم کرے گا اور نوجوانوں کو عالمی معیار کی تربیت حاصل کرنے کا یکساں موقع فراہم کرے گا۔پی آئی ٹی بی کے چیئرمین فیصل یوسف نے کہا کہ یہ اقدام نہ صرف پنجاب کے ٹیلنٹ پول کو مضبوط کرے گا بلکہ گریجویٹس کو عالمی سطح پر تیزی سے ترقی کرتی ٹیکنالوجی انڈسٹری میں مقابلے کے قابل بنائے گا، حکومت کا وژن صوبے کے نوجوانوں کو جدید ڈیجیٹل مہارتوں سے لیس کرنا ہے تاکہ وہ بین الاقوامی سطح پر اپنا مقام بنا سکیں۔

کریڈٹ: انڈیپنڈنٹ نیوز پاکستان-آئی این پی