انسداد دہشتگری عدالت اسلام آباد نے سابق وزیراعلی پنجاب چودھری پرویز الہی کی درخواست ضمانت پر پولیس کے ریکارڈ جمع نہ کروانے کے باعث سماعت ملتوی کردی۔ منگل کو انسداد دہشتگری عدالت اسلام آباد میں سابق وزیراعلی پنجاب چودھری پرویز الہی کی درخواست ضمانت پر سماعت ہوئی، درخواست ضمانت پر سماعت انسداد دہشتگردی عدالت کے جج ابو الحسنات ذوالقرنین نے کی۔ پولیس کی جانب سے ریکارڑ جمع نہ کروایا جا سکا جس پر عدالت نے پولیس کو ریکارڈ جمع کروانے کی ہدایت کرتے ہوئے کہا کہ درخواست ضمانت پر سماعت کل تک ملتوی کر دیتے ہیں۔ چودھری پرویز الہی کے وکیل نے سماعت 14 ستمبر تک ملتوی کرنے کی استدعا کر دی جس پر جج ابو الحسنات ذوالقرنین نے کہا کہ 14 ستمبر کو دیگر اہم کیسز لگے ہیں، 15 ستمبر کی تاریخ رکھ لیتے ہیں۔ بعدازاں عدالت نے سابق وزیراعلی پنجاب چودھری پرویز الہی کی درخواست ضمانت پر سماعت 15 ستمبر تک ملتوی کر دی۔

کریڈٹ: انڈیپنڈنٹ نیوز پاکستان-آئی این پی