راولپنڈی کے تھانہ پیر ودھائی میں تعینات سب انسپکٹر مبینہ طور پر رشوت ستانی میں ملوث نکلا۔تھانے کے اندر مبینہ لین دین کرنے کی ویڈیو سامنے آگئی، جس میں باوردی سب انسپکٹر کو اپنے کمرے میں بیٹھے چند افراد سے گفتگو کرتے دیکھا جا سکتا ہے۔ویڈیو میں ایک شخص کو کچھ رقم سب انسپکٹر کے سامنے بیٹھے شخص کی طرف بڑھاتے ہوئے دیکھا جا سکتا ہے۔ ویڈیو بنانے والا شخص کہتا ہے کہ یہ رقم پکڑو لیکن اپنا وعدہ بھی یاد رکھنا جس کے بعد سب انسپکٹر اپنا ہاتھ میز کی سائیڈ پر لے جاتا ہے۔سب انسپکٹر شہری سے پوری رقم کا مطالبہ کرتا ہے لیکن شہری کہتا ہے کہ باقی رقم کام پورا ہونے اور نتائج آنے کے بعد دیں گے۔ شہری کہتا ہے کہ ہم اپنے معاہدے سے پیچھے نہیں ہٹیں گے۔ویڈیو میں سادہ کپڑوں میں ملبوس شخص کو سب انسپکٹر کے ساتھ بیٹھ کر سگریٹ پیتے بھی دیکھا جا سکتا ہے جبکہ سب انسپکٹر کو کوئی کاغذ پھاڑتے بھی دیکھا جا سکتا ہے۔سی پی او سید خالد ہمدانی نے تھانہ پیر ودھائی کے سب انسپکٹر کی بدعنوانی کی شکایت پر نوٹس و اظہار برہمی کیا۔ انہوں نے سب انسپکٹر اشرف کو معطل کرکے چارج شیٹ جاری کر دی جبکہ ایس ایس پی آپریشنز کو انکوائری کرکے رپورٹ پیش کرنے کا حکم دیا۔سی پی او سید کا کہنا تھا کہ محکمانہ وقار کو مجروح کرنے والا ہم میں سے نہیں، کڑا احتساب کریں گے، بدعنوانی یا اختیارات سے تجاوز قطعا برداشت نہیں، افسران اپنا قبلہ درست کر لیں۔

کریڈٹ: انڈیپنڈنٹ نیوز پاکستان-آئی این پی