سائوتھ ایئر نے ڈیرہ اسماعیل خان کے لئے باقاعدہ پروازیں شروع کرنے کا اعلان کردیا۔ سائوتھ ایئر کے وفد نے کنور محمد طارق کی سربراہی میں گورنر خیبر پختونخوا فیصل کریم کنڈی سے ملاقات کی، گورنر نے سائوتھ ایئر کے وفد کو ڈی آئی خان اور چترال میں پروازوں کے لئے ہر ممکن تعاون کی یقین دہانی کرائی۔ فیصل کریم کنڈی نے کہا کہ خیبر پختونخوا میں ساتھ ایئر کو خوش آمدید کہتے ہیں، ساتھ ایئر کی پروازیں خیبر پختونخوا میں کامیاب ثابت ہوں گی، صوبے میں سیاحت اور کاروبار کے فروغ کے لیے فضائی رابطے ناگزیر ہیں۔ گورنر نے کہا کہ خیبر پختونخوا پاکستان کی سیاحت کا مرکز ہے، صوبے کے کئی اہم علاقے اب بھی فضائی سہولیات سے محروم ہیں، پشاور سے کراچی، لاہور اور کوئٹہ کی پروازیں صوبے میں معاشی سرگرمیوں میں تیزی لائیں گی۔ فیصل کریم کنڈی کا کہنا تھا کہ نئی ایئرلائنز کے فلائٹس سے خیبر پختونخوا ہ میں روزگار، سیاحت اور تجارتی سرگرمیوں میں اضافہ ہو گا۔

اس موقع پر سائوتھ ایئر کے وفد کی سربراہی کرنے والے کنور محمد طارق نے کہا کہ ساتھ ایئر نے تمام آپریشنل، تکنیکی اور انتظامی تیاریاں مکمل کر لی ہیں، ساتھ ایئر رواں ماہ ملک بھر میں اپنے فضائی آپریشن کا آغاز کررہی ہے۔ ملک کے چھوٹے اور دور دراز علاقوں کو فضائی نیٹ ورک سے جوڑنا ہمارا ہدف ہے۔ کنور محمد طارق نے کہا کہ ڈیرہ اسماعیل خان ہمارے لیے انتہائی اہم اسٹیشن ہے، ڈی آئی خان کے لئے روزانہ پروازیں چلانے کا منصوبہ رکھتے ہیں، ساتھ ایئر چترال کے لیے بھی باقاعدہ پروازیں شروع کرے گی۔انہوں نے مزید کہا کہ ساتھ ایئر پشاور سے کراچی، پشاور سے کوئٹہ، پشاور سے لاہور کے لئے بھی روزانہ پرواز چلائے گی۔

کریڈٹ: انڈیپنڈنٹ نیوز پاکستان-آئی این پی