سیالکوٹ انٹرنیشنل ایئرپورٹ اور اطراف میں شدید دھند کے باعث تمام فلائٹ آپریشن اور شیڈول جزوی طور پر متاثر ہوگئے۔ترجمان سیالکوٹ انٹرنیشنل ایئرپورٹ محمد عمیر خان کے مطابق ایئرپورٹ پر پروازوں کی محفوظ آمدورفت کے لیے حد نگاہ کم سے کم 500 میٹر درکار ہوتی ہے لیکن تاحال حد نگاہ 100 میٹر ہے۔دھند کی شدت میں کمی ہوتے ہی تمام فضائی آپریشن شیڈول کے مطابق چلے گا۔ ائیرپورٹ انتظامیہ تمام ایئر لائنز کے ساتھ رابطے میں ہے۔ترجمان کے مطابق مسافروں سے گزارش ہے کہ وہ اپنی پرواز سے متعلق تفصیلات ایئرلائن سے حاصل کریں۔دوسری جانب، دھند کے باعث علامہ اقبال انٹرنیشنل ایئرپورٹ پر بھی فلائٹ آپریشن متاثر ہے۔ رن وے پر حد نگاہ 150میٹر ریکارڈ ہوئی جس کے باعث 3 پروازیں اسلام آباد ایئرپورٹ اتریں۔ایئرپورٹ ذرائع کے مطابق دھند کے باعث 25 سے زائد پروازیں تاخیر کا شکار ہوئیں۔ جدہ، دبئی اور دمام سے لاہور کے لیے پروازوں کو اسلام آباد ایئرپورٹ اتارا گیا۔دوحہ، بحرین، ابوظہبی اور ریاض سے لاہور کے لیے پروازیں تاخیر کا شکار ہوئیں۔ لاہور سے جدہ، دبئی اور دوحہ کے لیے پروازوں کو بھی تاخیر کا سامنا رہا۔

کریڈٹ: انڈیپنڈنٹ نیوز پاکستان-آئی این پی