خیبر پختونخوا کے ضلع شمالی وزیرستان کے علاقے بویا میں سیکیورٹی فورسز کے بٹالین ہیڈکوارٹر پر پر فتنہ الخوارج کا حملہ ناکام بناتے ہوئے چار دہشت گرد جہنم واصل کردئیے گئے ۔سیکیورٹی ذرائع کے مطابق جمعہ کی صبح ایک خوارجی خودکش بمبار نے بارودی مواد سے بھری گاڑی بویا قلعے کی مغربی دیوار سے ٹکرا دی اور زوردار دھماکہ ہو ا۔ دھماکے کے بعد 4 سے 5 خوارج نے قلعے میں داخل ہونے کی کوشش کی، تاہم سیکیورٹی فورسز کی بروقت اور بھرپور جوابی کارروائی کے نتیجے میں 3 خوارج موقع پر ہی ہلاک کردئیے گئے جبکہ ایک خارجی کو محاصرے میں لینے کی اطلاع ہے اور آپریشن تا حال جاری ہے۔حملہ آور صرف بیرونی دیوار کو جزوی نقصان پہنچانے میں کامیاب ہو سکے ۔ مقامی ذرائع کے مطابق دھماکے کی آواز تقریبا 25 کلومیٹر دور واقع میرانشاہ شہر تک سنی گئی۔

ابتدائی طور پر پولیس نے بتایا تھا کہ حملہ آور احاطے میں داخل ہونے میں کامیاب ہوگئے اور انہوں نے فائرنگ کی۔ فائرنگ کے تبادلے میں چار دہشت گرد ہلاک جبکہ چار سیکیورٹی اہلکار زخمی ہوئے۔دھماکے کے فورا بعد سیکیورٹی فورسز نے علاقے کو گھیرے میں لے کر کلیئرنس آپریشن شروع کردیا۔پولیس اور سیکیورٹی اہلکاروں کی بھاری نفری جائے وقوع پر پہنچ گئی، جبکہ بم ڈسپوزل اسکواڈ کی خصوصی ٹیمیں بھی شواہد اکٹھا کرنے کے لیے روانہ کی گئیں۔ریسکیو 1122 اور طبی ٹیمیں بھی امدادی اور ریسکیو سرگرمیوں میں مصروف رہیں۔ حکام کے مطابق جائے وقوع سے شواہد اکٹھے کیے جا رہے ہیں اور تحقیقات جاری ہیں۔واقعے کے بعد پورے ضلع میں سیکیورٹی ہائی الرٹ کردی گئی جبکہ احتیاطی تدبیر کے طور پر ایک اہم شاہراہ پر ٹریفک عارضی طور پر معطل کر دی گئی۔

کریڈٹ: انڈیپنڈنٹ نیوز پاکستان-آئی این پی