ڈپٹی کمشنر کوٹلی حق نواز چوہدری نے کہا  ہے کہ وزیراعظم آزاد کشمیر کے احکامات کی روشنی میں شہریوں کے بنیادی مسائل حل کرنے کیلئے کوشاں ہیں بجلی کے بلات میں عائد اضافی ٹیکسز کی معطلی کا نوٹیفکیشن جاری کردیا ہے اب شہری بل جمع کروا رہے ہیں۔ سرکاری اداروں میں ملازمین کی حاضری یقینی بنانے کے لئے بائیو میٹرک نظام نافذ کردیا گیا ہے۔ پانچ سال سے زیر التواء کیسوں کے فیصلے کردیئے گئے ہیں۔ بحیثیت کلکٹر تین سو سے زائد کیسوں کے فیصلے صرف دس ماہ میں کئے ہیں۔ شہر میں ٹریفک کے مسائل کو حل کرنے کے لئے بائی پاس روڈ اور واٹر سپلائی کی بڑی سکیم زیر غور ہے۔ گزشتہ روز یہاں خصوصی بات چیت کرتے ہوئے ڈپٹی کمشنر حق نواز چوہدری نے کہا کہ بجلی کے بلات کا ایشو پورے ملک میں چل رہا ہے تاہم اس مسئلہ کو احسن انداز میں حل کرلیا گیا ہے۔ اضافی ٹیکسز کو معطل کرنے سے شہری اب بل جمع کرارہے ہیں۔ انہوں نے کہا وزیراعظم آزاد کشمیر کے احکامات  کی روشنی میں شہریوں کے بنیادی مسائل ان کی دہلیز پر حل کررہے ہیں بنیادی دستاویزات کے حصول اور دیگر مسائل کے لئے دفاتر میں آنے والے شہریوں کو چکر لگوانے کی بجائے فوری طور پر ان کی درخواستیں نمٹائی جاتی ہیں۔ انہوں نے کہا کہ بحیثیت ڈسرکٹ کلکٹر روزانہ کی بنیاد پر کیسوں کی سماعت کرتا ہوں اور گزشتہ دس ماہ کے دوران تین سو سے زائد کیسز نمٹائے گئے ہیں اور ان میں ایسے کیسز بھی شامل ہیں جو گزشتہ پانچ سالوں سے زیر التواء تھے۔  انہوں نے کہا کہ اپنے اختیارات سب ڈویژنل مجسٹریٹ کو تفویض کردیئے ہیں تاکہ شہریوں کے معمولی نوعیت کے کیسز ان کے علاقوں میں ہی سنے جائیں۔ انہوں نے کہا کہ کوٹلی شہر کے لئے بائی پاس روڈ زیر غور ہے تاکہ سہر میں ٹریفک کا دبائو کم ہوسکے جبکہ پانی کا بنیادی مسئلہ حل کرنے کے لئے گریٹ واٹر سپلائی سکیم کی منظوری کے لئے کوشاں ہوں۔ انہوں نے کہا کہ شہر کا ماسٹر پلان مرتب کیا جارہا ہے جبکہ انسداد تجاوزات اور سیوریج کے مسائل بھی حل کررہے ہیں انہوں نے کہا کہ  کسی کا جائز کام رکتا نہیں جبکہ ناجائز کام نہیں ہوتا شہریوں کو چوبیس گھنٹے دستیاب ہوں۔

کریڈٹ: انڈیپنڈنٹ نیوز پاکستان-آئی این پی