بلوچستان کے وزیر آبپاشی میر صادق عمرانی نے کہا ہے ک کہ واپڈا حکام نے زرعی ٹیوب ویلز کی سولر پر منتقلی کا فیصلہ غلط کیا ، سولر سے 24گھنٹے پانی نکالا جارہا ہے جس سے پانی کا گراف نیچے جارہا ہے ۔ ایک نجی ٹی وی سے گفتگو کرتے ہوئے میر صادق عمرانی نے کہا کہ واپڈا حکام نے زرعی ٹیوب ویلز کی سولر پر منتقلی کا فیصلہ غلط کیا۔انہوں نے کہا کہ صوبے میں پانی کی قلت اور بحرانی کیفیت ہے جس سے زیر زمین پانی کی سطح روز بروز گرتی جارہی ہے، پہلے کیسکو زمینداروں کو 4 گھنٹے بجلی دیتی تھی اور اس کے پیسے بھی لیتی تھی تو زمیندار احتیاط سے بجلی استعمال کرتے تھے ، اب سولر سے 24گھنٹے پانی نکالا جارہا ہے جس سے پانی کا گراف نیچے جارہا ہے ۔میر صادق عمرانی کا کہنا تھا کہ نصیر آباد کے نہری نظام میں پانی کی قلت ہے، اس کو حل کرنے کی کوشش کی جارہی ہے ،صوبے میں زراعت کی بہتری کیلئے کام کرنا محکمہ زراعت کی ذمہ داری ہے۔

کریڈٹ: انڈیپنڈنٹ نیوز پاکستان-آئی این پی