زمبابوے کی قومی ٹی ٹوئنٹی ٹیم کے کپتان سکندر رضا کے گھر میں افسوسناک سانحہ پیش آیا ، جہاں ان کے 13 سالہ بھائی محمد مہدی انتقال کر گئے۔زمبابوے کرکٹ کی جانب سے جاری کیے گئے ایک باضابطہ بیان میں سکندر رضا کے بھائی کے انتقال کی تصدیق کرتے ہوئے کہا گیا کہ محمد مہدی 29 دسمبر کو دارالحکومت ہرارے میں انتقال کر گئے۔ بیان کے مطابق محمد مہدی پیدائشی طور پر ایک سنگین اور نایاب بیماری ہیموفیلیا میں مبتلا تھے، جس کے باعث انہیں طویل عرصے سے طبی پیچیدگیوں کا سامنا تھا۔ حالیہ دنوں میں ان کی صحت مزید بگڑ گئی، جس کے نتیجے میں وہ جانبر نہ ہو سکے۔

ہیموفیلیا ایک ایسی بیماری ہے جس میں خون جمنے کی صلاحیت متاثر ہو جاتی ہے، معمولی زخم یا چوٹ بھی جان لیوا ثابت ہو سکتی ہے۔ محمد مہدی کی کم عمری میں اس بیماری سے طویل جدوجہد نے اہل خانہ کے لیے اس نقصان کو مزید تکلیف دہ بنا دیا ہے۔زمبابوے کرکٹ نے اپنے بیان میں کہا کہ اس کٹھن وقت میں کرکٹ بورڈ، ٹیم مینجمنٹ، کھلاڑی اور اسٹاف سکندر رضا اور ان کے خاندان کے ساتھ کھڑے ہیں۔ زمبابوے کرکٹ نے مرحوم کے لیے دعائے مغفرت اور لواحقین کے لیے صبر جمیل کی دعا بھی کی ہے کرکٹ شائقین اور ساتھی کھلاڑیوں کی جانب سے سکندر رضاکے لئے ہمدردی اور تعزیت کے پیغامات کا سلسلہ جاری ہے۔

کریڈٹ: انڈیپنڈنٹ نیوز پاکستان-آئی این پی