پاکستان اور بھارت کے درمیان جنگ بندی کے بعد بھارتی کرکٹ بورڈ نے انڈین پریمیئر لیگ(آئی پی ایل) کو دوبارہ شروع کرنے کا اعلان کر دیا۔آئی پی ایل کو گزشتہ ہفتے پاکستان اور بھارت کے درمیان کشیدگی کے باعث معطل کر دیا گیا تھا۔ آئی پی ایل کا دھرم شالہ میں کھیلا جانے والا میچ بھی روک دیا گیا تھا اور اسٹیڈیم کی لائٹس بند کر دی گئی تھیں جبکہ غیر ملکی کھلاڑیوں نے آئی پی ایل چھوڑ کر اپنے وطن جانے کے لیے پروازوں کی دستیابی دیکھنا شروع کر دی تھی۔ تاہم پاکستان کی جانب سے بھارتی جارحیت کا منہ توڑ جواب دینے اور دونوں ملکوں کے درمیان جنگ بندی کے بعد اب آئی پی ایل کو دوبارہ شروع کرنے کا اعلان کیا گیا ہے۔بھارتی کرکٹ بورڈ (بی سی سی آئی )کے مطابق آئی پی ایل کے بقیہ میچز 17 مئی سے 3 جون تک 6 شہروں میں کھیلے جائیں گے۔بی سی سی آئی کا کہنا ہے کہ 17 مئی کو رائل چیلنجرز بنگلور اور دفاعی چیمپئن کولکتہ نائٹ رائیڈرز کے درمیان میچ کھیلا جائے گا۔

کریڈٹ: انڈیپنڈنٹ نیوز پاکستان-آئی این پی