پاکستان شاہینز (پاکستان اے ) کے آل رائو نڈر معاذ صداقت نے کہا ہے کہ الحمداللہ میں بہت زیادہ خوش ہوں کیونکہ میں نے پاکستان کیلئے بہترین پرفارم کیا ہے اور میچ جیتا ہے۔معاذ صداقت نے بھارتی ٹیم سے تاریخی جیت کے بعد اپنے بیان میں کہا کہ میں ہر آنے والے میچ کیلئے بہت پرامید ہوں، میرا مستقبل میں بھی ایسی ہی پرفارمنسز دینے کا منصوبہ ہے۔معاذ صداقت کا کہنا تھا کہ میرے سامنے بھارتی ہو یا کوئی بھی اور ٹیم، میں سب کو ایک ہی نظر سے دیکھتا ہوں، سب کے خلاف ایک جیسا میچ کھیلتا ہوں اور اپنے کھیل کو انجوائے کرتا ہوں۔انہوں نے مزید کہا کہ مجھ سمیت سب کھلاڑیوں کا یہی منصوبہ ہے کہ پاکستان کیلئے یہ ٹرافی جیت کر لانی ہے۔معاذ صداقت نے کہا کہ ہم بطور ٹیم گیم ٹو گیم چل رہے ہیں، مستقبل کے بارے میں نہیں سوچتے اور جو میچ ہوتا ہے اس کیلئے سر توڑ محنت اور منصوبہ بندی کرتے ہیں۔واضح رہے کہ ایشیا کپ رائزنگ اسٹارز ٹی20 کے گروپ میں پاکستان شاہینز نے بھارت اے کو 8 وکٹوں سے شکست دے کر سیمی فائنل تک رسائی حاصل کر لی۔

کریڈٹ: انڈیپنڈنٹ نیوز پاکستان-آئی این پی