سابق کپتان قومی کرکٹ ٹیم شاہد آفریدی نے کہا ہے کہ پانی زندگی کا سرچشمہ ہے، اسے ہتھیارکے طور پر استعمال کرنا یا اس بارے میں سوچنا بھی غیر انسانی اور انتہا پسندانہ رویہ ہے۔سوشل میڈیا پر وائرل ایک ویڈیو میں بھارتی فوج کا ریٹائرڈ لیفٹیننٹ جنرل کنول جیت سنگھ ڈھلوں پانی کو بطور ہتھیار استعمال کرکے پاکستان کو تباہ کرنے کا منصوبہ بتا رہا ہے۔ سابق بھارتی جنرل کے بیان پر ردعمل دیتے ہوئے شاہد آفریدی کا کہنا تھا کہ موسمی تبدیلیوں کے بڑھتے اثرات ہر سال تباہی کی شدت کو بڑھا رہے ہیں، وقت آگیا ہے کہ ارباب اختیار ہر سیاسی اختلاف سے بالا تر ہو کر قومی مفاد میں فیصلے کریں۔ سابق کپتان کا کہنا تھا کہ ڈیمز کی تعمیر اور پانی کے تحفظ سمیت ماحولیاتی استحکام کے لیے فوری اور ٹھوس اقدامات ناگزیر ہیں، اگر ہم نے آج متفقہ حکمت عملی نہ اپنائی تو آنے والے سالوں میں یہ تباہی ہمارے بس سے باہر ہو جائیگی۔ آئیں، مل کر پانی اور زندگی کو بچائیں ۔

کریڈٹ: انڈیپنڈنٹ نیوز پاکستان-آئی این پی