ڈائریکٹوریٹ آف ملیریا کنٹرول پاکستان نے ملک کے پہلے جی 6 پی ڈی پائلٹ منصوبے کے نتائج جاری کر دئیے ۔ ترجمان وزارت صحت کے مطابق انسداد ملیریا پروگرام کے حوالے سے اجلاس منعقد کیا گیا جس میں ڈایریکٹوریٹ ملیریا اور عالمی ادارے ترقی برائے ادویات کے تعاون سے پاکستان کے 9 متاثرہ اضلاع میں جی 6 پی ڈی پائلٹ منصوبے کے نتائج پر روشنی ڈالی گئی۔اجلاس میں ڈبلیو ایچ او یونیسیف، گلوبل فنڈ، میڈیسنز فار ملیریا وینچر سمیت قومی و بین الاقوامی اداروں کے نمائندے شریک ہوئے۔ قومی ادارہ تدارک برائے ملیریا کے ڈایریکٹر ڈاکٹر مختار نے منصوبے پر بریفننگ دی جس میں واضح کیا گیا کہ بنیادی صحت کے نظام میں جی 6 پی ڈی ٹیسٹنگ کو موثر طریقے سے ضم کیا جا سکتا ہے۔ڈاکٹر مختار بھرتھ کا کہنا تھا کہ 2022 کے سیلاب میں 28 لاکھ سے زائد ملیریا کیسز رپورٹ ہونے کے بعد اس ایجنڈے کی اہمیت مزید بڑھ گئی ہے۔

ہم اس پائلٹ منصوبے کے نتائج کو اپنی قومی حکمت عملی سے ہم آہنگ کر رہے ہیں۔ڈاکٹر مختار بھرتھ کا مزید کہنا تھا کہ قبل ازیں پاکستان میں ملیریا کے مریض پریما کوئن دوا کے چودہ دن کے استعمال کے بعد مکمل صحت یاب ہوتے تھے۔ ملیریا کے مریض یہ دوا دو تین دن کھانے کے بعد چھوڑ دیتے ہیں جس سے مریض صحت یاب نہیں ہوتے۔ مریضوں کی دوائی کا مکمل کورس نہ لینے کا یہ رویہ پاکستان سمیت دنیا بھر میں چیلنج بناہوا ہے۔ ٹیفنو کوئین دوا کے استعمال کے بعد ملیریا کے خاتمے کی کوششوں میں بڑی پیش رفت ہو گی۔ڈایریکٹر نے مزید بتایا کہ پاکستان جلد ان ممالک کی صف میں کھڑا ہو گا جو اس دوا کی مکمل تحقیق کے بعد ااس دوا کا استعمال شروع کر رھے ہیں۔ڈاکٹر مختار بھرتھ نے بتایا کہ پاکستان اگلے سال 2026 میں انٹر نیشنل کانفرنس برائے خاتمہ ملیریا کروانے جارہا ہے ۔ اس کانفرنس میں دنیا بھر کے سائنسدانوں ماہرین مندوبین کو مدعو کیا جائے گا۔

کریڈٹ: انڈیپنڈنٹ نیوز پاکستان-آئی این پی