یونیورسل سروس فنڈ نے 2025 کے دوران اپنے فور جی ایکسس پروگرام اور سیاحتی مقامات کے منصوبوں کے تحت براڈ بینڈ رابطے کے مجموعی طور پر 10 منصوبے مکمل کر لیے ہیںجس سے پاکستان میں ڈیجیٹل شمولیت کے ہدف کو نمایاں طور پر آگے بڑھایا گیا ہے۔ویلتھ پاکستان کو دستیاب دستاویز کے مطابق یہ مکمل شدہ منصوبے ملک کے دور دراز اور کم ترقی یافتہ علاقوں میں بغیر سہولت اور کم سہولت رکھنے والی آبادی کو تیز رفتار اور سستے انٹرنیٹ تک رسائی فراہم کرنے کے لیے شروع کیے گئے تھے۔نیشنل ہائی وے اور موٹروے کے سیاحتی مقامات فور جی پروگرام کے تحت دو منصوبے مکمل کیے گئے۔پہلا منصوبہ این ایچ اینڈ ایم ڈبلیو لاٹ 10 ایم 8 تھاجو گوادر، کیچ، آواران، خضدار، جھل مگسی، قمبر شہدادکوٹ اور لاڑکانہ اضلاع میں نافذ کیا گیا۔ اس منصوبے میں 413 کلومیٹر سڑکوں کے حصے شامل تھے اور اس پر 3.8 ارب روپے کی سبسڈی دی گئی۔سیاحتی منصوبے کے تحت دوسرا منصوبہ ٹورسٹ ڈیسٹینیشن کے ٹو تھاجو خیبر پختونخوا میں سوات، اپر دیر اور بٹگرام اضلاع میں مکمل کیا گیا۔ اس منصوبے میں آٹھ سیاحتی مقامات، 49 کلومیٹر رسائی کے راستے اور 413 کلومیٹر سڑکوں کے حصے شامل تھے جبکہ اس پر مجموعی طور پر 4 ارب روپے کی سبسڈی دی گئی۔اس کے علاوہ فور جی ایکسس پروگرام کے تحت خیبر پختونخوا، بلوچستان اور پنجاب میں آٹھ منصوبے مکمل کیے گئے جن کے ذریعے مجموعی طور پر 1,092 موضع جات کا احاطہ کیا گیا اور 12 لاکھ 44 ہزار 935 افراد کو فائدہ پہنچا۔ ان منصوبوں کے لیے مجموعی طور پر 12.18 ارب روپے کی سبسڈی دی گئی۔

خیبر پختونخوا میں سوات لاٹ منصوبے کے تحت 26 موضع جات شامل تھے جہاں 43 ہزار 520 افراد آباد ہیںاور اس منصوبے پر 586 ملین روپے کی سبسڈی دی گئی۔بلوچستان میں چار منصوبے مکمل کیے گئے جن میں لسبیلہ لاٹ شامل ہے جس میں 218 موضع جات، ایک لاکھ 49 ہزار 614 آبادی اور 1.7 ارب روپے کی سبسڈی شامل ہے۔ لورالائی لاٹ میں 143 موضع جات، 81 ہزار 963 آبادی اور 2.5 ارب روپے کی سبسڈی دی گئی۔ سبی لاٹ میں 43 موضع جات، 38 ہزار 178 آبادی اور 1.2 ارب روپے کی سبسڈی شامل ہے۔ قلعہ سیف اللہ لاٹ میں 109 موضع جات، ایک لاکھ 20 ہزار 257 آبادی اور 3.5 ارب روپے کی سبسڈی دی گئی۔پنجاب میں تین منصوبے مکمل کیے گئے۔ میانوالی لاٹ میں 190 موضع جات شامل تھے جہاں 3 لاکھ 72 ہزار 742 افراد آباد ہیںاور اس منصوبے پر 1.6 ارب روپے کی سبسڈی دی گئی۔ ننکانہ صاحب لاٹ میں 250 موضع جات شامل تھے جن سے 2 لاکھ 94 ہزار 506 افراد مستفید ہوئے اور اس پر 457 ملین روپے کی سبسڈی دی گئی۔سیالکوٹ لاٹ میں 113 موضع جات شامل تھے جہاں ایک لاکھ 44 ہزار 155 افراد آباد ہیں اور اس منصوبے پر 586 ملین روپے کی سبسڈی دی گئی۔یو ایس ایف حکام کے مطابق یہ تمام منصوبے ادارے کے اس وژن کے مطابق ہیں جس کا مقصد انفارمیشن اور کمیونیکیشن ٹیکنالوجی کے ذریعے بغیر سہولت اور کم سہولت رکھنے والی آبادی کو بااختیار بنانا ہے۔ ان کا کہنا ہے کہ تیز رفتار اور سستا انٹرنیٹ ہر فرد تک پہنچا کر لوگوں کی زندگیوں کو بہتر بنانا اور ڈیجیٹل طور پر شامل پاکستان کی تشکیل ان منصوبوں کا بنیادی ہدف ہے۔

کریڈٹ: انڈیپنڈنٹ نیوز پاکستان-آئی این پی ویلتھ پاک