روس کے صدر ولادیمیر پیوٹن نے اسرائیل فلسطین مسئلے کا واحد اور پائیدار حل فلسطینی ریاست کے قیام کو قرار دے دیا۔غیر ملکی خبر رساں ادارے کے مطابق روسی صدرولادیمیر پیوٹن نے ماسکو میں قطر کے امیر شیخ تمیم بن حمد الثانی سے ملاقات کی۔ ملاقات میں ، غزہ اور شام سے متعلق صورتحال پر تبادلہ خیال کیا گیا۔ اس موقع پر صدر پیوٹن نے غزہ میں معصوم فلسطینیوں کی شہادت پر اظہار افسوس کرتے ہوئے کہا مسئلے کا واحد اور پائیدار حل یو این قراردادوں کے مطابق فلسطینی ریاست کا قیام ہے۔ انہوں نے کہا کہ شام کو آزاد، خودمختار اور متحدہ ریاست بنانے میں ہر ممکن مدد کیلئے تیار ہیں، صدر پیوٹن نے غزہ جنگ بندی کیلئے قطر کی کوششوں کو سراہا۔امیر قطر شیخ تمیم نے کہا اسرائیل غزہ جنگ بندی معاہدے کی پاسداری کرنے میں ناکام رہا، آزاد فلسطینی ریاست کے قیام کے بغیر خطے میں امن ممکن نہیں۔ دونوں رہنمائوں نے شام کو آزاد، خودمختار اور متحد ریاست بنانے کی مشترکہ کوششوں پر بھی اتفاق کیا۔ دریں اثنا امیر قطر شیخ تمیم بن حمد الثانی کے دورہ روس کے موقع پر روس اور قطر کے درمیان 2 ارب ڈالر کے دوطرفہ سرمایہ کاری معاہدے پر دستخط کئے گئے۔

کریڈٹ: انڈیپنڈنٹ نیوز پاکستان-آئی این پی