روس کے وزیر خارجہ سرگئی لاروف نے غزہ کے لئے بین الاقوامی مبصر مشن کی اپیل کرتے ہوئے کہا ہے کہ اسرائیل کا حماس کو بہانہ بنا کرفلسطینی عوام کو اجتماعی سزا دینا ناقابل قبول ہے،سرگئی لاروف نے مشترکہ مستقبل کی تعمیرکے مرکزی خیال کے ساتھ قطر میں منعقدہ 21ویں دوحہ فورم سے خطاب میں کہا کہ 7اکتوبر کو حماس کا اسرائیل پر حملہ بے سبب نہیں تھا، یہ حملہ اصل میں سالوں سے جاری محاصرے اور فلسطینی حکومت کے قیام سے متعلق کھوکھلے وعدوں کے بعد کیا گیا ہے،لاروف نے کہا کہ ہم نے سالوں تک اسرائیل کو یہ سمجھانے کی کوشش کی ہے کہ فلسطینی حکومت کا قیام عمل میں نہ آنا مشرق وسطی میں انتہا پسندی کو ہوا دینے والا ایک اہم عنصر ہے، فلسطین کی حکومتی حیثیت کا معلق رہنا علاقے کا خطرناک ترین پہلو ہے،انہوں نے کہا کہ ہم نے اقوام متحدہ کے سیکرٹری جنرل انتونیو گٹرس کے ساتھ، غزہ میں ایک بین الاقوامی مبصر مشن کی ضرورت پر اور غزہ میں انسانی فائر بندی کی یقین دہانی کے لئے بین الاقوامی دباو ڈالنے کے موضوع پر ، بات چیت کی ہے۔

کریڈٹ: انڈیپنڈنٹ نیوز پاکستان-آئی این پی