امریکی صدر ڈونلڈ ٹرمپ نے کہا ہے کہ وال اسٹریٹ جرنل اور اس کے ارب پتی مالک روپرٹ مرڈوک، ان کی جانب سے اخبار پر دائر ہتکِ عزت کے مقدمے کو نمٹانا چاہتے ہیں۔ برطانوی خبر رساں ادارے کی رپورٹ کے مطابق 18 جولائی کو ڈونلڈ ٹرمپ نے وال اسٹریٹ جرنل اور اس کے مالکان (جن میں مرڈوک بھی شامل ہیں) کے خلاف مقدمہ دائر کیا تھا۔مقدمے کی بنیاد ایک ایسی رپورٹ ہے جس میں کہا گیا تھا کہ ٹرمپ کا نام بدنام زمانہ جنسی مجرم جیفری ایپسٹین کو دی گئی سالگرہ کی مبارکباد میں شامل تھا، جس میں ایک جنسی نوعیت کی تصویر اور خفیہ رازوں کا حوالہ موجود تھا۔ٹرمپ نے ایئر فورس ون میں صحافیوں سے بات کرتے ہوئے کہا کہ میرے ساتھ وال اسٹریٹ جرنل نے بہت برا سلوک کیا ہے، میں یہ فرض کرتا ہوں کہ روپرٹ مرڈوک اسے کنٹرول کرتے ہیں، لیکن شاید کرتے ہوں، شاید نہ کرتے ہوں۔انہوں نے مزید کہا کہ وہ ہمارے ساتھ کچھ کرنے کی بات کر رہے ہیں، دیکھتے ہیں کیا ہوتا ہے، شاید وہ چاہتے ہیں کہ ہم یہ مقدمہ واپس لے لیں، تو دیکھتے ہیں، ہاں، وہ چاہتے ہیں کہ معاملہ طے ہو جائے۔انہوں نے کہا کہ جب میرے ساتھ ناانصافی ہوتی ہے تو میں اس کے خلاف قدم اٹھاتا ہوں۔ٹرمپ کے مقدمے میں دعوی کیا گیا ہے کہ سالگرہ کی مبینہ مبارکباد جعلی ہے اور وال اسٹریٹ جرنل نے یہ خبر جان بوجھ کر صدر کی ساکھ کو نقصان پہنچانے کے لیے شائع کی۔پیر کے روز عدالت میں ایک درخواست میں ٹرمپ نے مطالبہ کیا ہے کہ مرڈوک کا فوری بیان قلمبند کروایا جائے، وال اسٹریٹ جرنل نے اس پر فوری طور پر کوئی تبصرہ نہیں کیا۔

کریڈٹ: انڈیپنڈنٹ نیوز پاکستان-آئی این پی