امریکی ٹی وی نے دعوی کیا ہے کہ ایران اور اسرائیل کے درمیان ممکنہ جنگ بندی کے معاہدے میں قطر نے اہم سفارتی کردار ادا کیا ہے جبکہ کہ کہ امریکی صدر ڈونلڈ ٹرمپ نے اسرائیلی وزیراعظم نیتن یاہو کو فون کرکے جنگ بندی کا کہا اور بتایا کہ اب مزید جنگ نہیں ہوگی، ایرانی کمزور پڑ چکے ہیں ۔امریکی ٹی وی کی رپورٹ کے مطابق قطری رہنماوں کی جانب سے ایران کوجنگ بندی تجاویز دی گئیں جبکہ نائب صدرجے ڈی وینس نے صدرٹرمپ اور قطری رہنمائوں کے ساتھ جنگ بندی کرائی۔ رپورٹ کے مطابق قطری وزیر اعظم شیخ محمد بن عبدالرحمن آل ثانی نے اس معاہدے کو طے کروانے میں براہ راست مداخلت کی ۔امریکی میڈیا سے گفتگو کرنے والے بعض نامعلوم حکام کے مطابق قطر نے اس وقت ثالثی کا کردار ادا کیا جب امریکہ کی جانب سے جنگ بندی کی تجویز ایران تک پہنچانے کی کوشش کی جا رہی تھی۔ ان حکام کے مطابق قطری وزیر اعظم نے ایرانی حکام سے ٹیلی فونک رابطہ کیا، جو اس وقت خاص طور پر اہمیت اختیار کر گیا جب ایران نے خطے میں امریکی فوجی اڈوں، بشمول قطر میں موجود اڈے، کو نشانہ بنایا تھا۔ذرائع کا کہنا ہے کہ ایران کے ساتھ قطر کی بات چیت کے بعد امریکہ کی تجویز کو سنجیدگی سے زیرِ غور لایا گیا اور جنگ بندی کی راہ ہموار ہوئی۔

کریڈٹ: انڈیپنڈنٹ نیوز پاکستان-آئی این پی