برطانوی وزیرِ اعظم رشی سونک نے کہا کہ مغربی ممالک کو روسی اثاثہ جات ضبط کرنے کے بارے میں مزید جرت کا مظاہرہ کرنا چاہیے جو انہوں نے 2022میں یوکرین پر ملک کے مکمل حملے کے بعد منجمد کر دیئے تھے۔سونک نے روس یوکرین جنگ کے  دو سال مکمل ہونے پر  برطانوی اخبار میں لکھے  گئے ایک مضمون میں کہا کہ یوکرین کو طویل فاصلے تک مار کرنے والے ہتھیاروں، ڈرونز اور گولہ بارود کے ساتھ ساتھ دیگر امداد کی بھی مسلسل ضرورت ہے۔انہوں نے کہا کہ ہمیں روسی جنگی معیشت کو نقصان پہنچانے میں زیادہ دلیری سے کام لینا چاہیے اور ہمیں سیکڑوں اربوں کے منجمد روسی اثاثوں کو ضبط کرنے میں زیادہ دلیر ہونا چاہیے۔جی سیون ممالک اثاثہ جات کی ممکنہ ضبطی کا ایسے طریقے کے طور پر جائزہ لے رہے ہیں کہ یوکرین پر حملے سے ہونے والے نقصان کی روس سے ادائیگی کروائی جا سکے۔سونک نے امریکہ پر بھی زور دیا کہ وہ یوکرین کے لیے مالی اور فوجی مدد جاری رکھے۔انہوں نے اپنے مضمون میں لکھا کہ امریکہ نے یوکرین اور یورو اٹلانٹک سکیورٹی کے لئے جو کچھ کیا ہے، ہمیں کبھی بھی اسے کم نہیں سمجھنا چاہئے۔ میں ان پر زور دیتا ہوں کہ وہ اس حمایت کو جاری رکھیں اور مجھے یقین ہے کہ وہ کریں گے۔

کریڈٹ: انڈیپنڈنٹ نیوز پاکستان-آئی این پی