سابق صدر مملکت اور پی ٹی آئی رہنماڈاکٹر عارف علوی نے بھی مذاکرات کی حمایت کر تے ہوئے کہا ہے کہ آئندہ انتخابات سے متعلق مذاکرات ہوتے ہیں تو خیرمقدم کریں گے،بانی پی ٹی آئی نے ملک کی خاطر مذاکرات کی حامی بھری ہے۔ان خیالات کااظہار انہوں نے اپنے دورہ امریکہ کے دوران امریکی نشریاتی ادارے کو انٹرویو میں کیا ۔ سابق صدر نے کہا کہ ہم اس بات کو سراہیں گے کہ آئندہ الیکشنز اور جمہوریت کے قیام کیلئے مذاکرات ہوں۔ انہوں نے کہا ملک میں ہونے والے احتجاج کو طاقت کے زور پر روکا جا رہا ہے۔ پاکستان میں پرنٹ،الیکٹرانک اور سوشل میڈیا اس وقت آزاد نہیں ہیں۔ عوام میں مایوسی بڑھ رہی ہے۔ بلوچستان کا نوجوان اس وقت مایوس ہے کیوں کہ اس کی آواز نہیں سنی جا رہی۔بلوچستان کے مسئلے کا حل بھی مذاکرات میں ہے۔ان کا کہنا تھا کہ 8 فروری کے الیکشن میں پی ٹی آئی بلوچستان سے جیتی مگر ہمارے ووٹ کم گنے گئے، ووٹ کم نہ گنے جاتے تو بلوچستان سمیت تمام صوبوں میں ہماری حکومت ہوتی۔

کریڈٹ: انڈیپنڈنٹ نیوز پاکستان-آئی این پی