پاکستان میں گزشتہ سال ملک کی تقریبا نصف آبادی نے لنڈا بازاروں سے استعمال شدہ پرانے کپڑے خریدے۔ گیلپ پاکستان کی جانب سے نئے سروے میں بتایا گیا ہے کہ گزشتہ سال پاکستان کی لگ بھگ نصف آبادی نے لنڈا بازاروں کا رخ کیا اور پرانے استعمال شدہ کپڑے خریدے۔ سروے کا یہ نتیجہ شہریوں کے رجحان کے ساتھ ان کے معاشی حقائق کو ظاہر کرتا ہے۔سروے میں پوچھا گیا تھا کہ کیا آپ نے گزشتہ سال لنڈا بازار سے کپڑے، سوئٹر یا کوٹ خریدے؟۔اس سوال کے جواب میں 48 فیصد پاکستانیوں نے بتایا کہ انہوں نے گزشتہ سال لنڈا بازاروں سے استعمال شدہ کپڑے خریدے۔ 51 فیصد پاکستانی شہریوں نے پرانے کپڑے خریدنے سے انکار کیا جبکہ ایک فیصد لوگ وہ تھے، جنہوں نے اس سوال کا کوئی جواب نہیں دیا۔یہ سروے رواں سال 7 سے 22 مارچ 2025 کے درمیان کمپیوٹر اسسٹڈ ٹیلی فون انٹرویو (CATI) کا استعمال کرتے ہوئے کیا گیا جس میں ملک کے چاروں صوبوں کے شہری اور دیہی علاقوں سے مجموعی طور پر 779 مرد و خواتین نے شرکت کی۔

کریڈٹ: انڈیپنڈنٹ نیوز پاکستان-آئی این پی