خیبرپختونخوا حکومت کے مشیر برائے اطلاعات بیرسٹر سیف نے مسلم لیگ( ن ) اور سابق وزیراعظم نواز شریف پر کڑی تنقید کرتے ہوئے کہا ہے کہ پی ٹی آئی پر تنقید کرنے والی حکومت پہلے اپنی جماعت کے صدر سے بھارتی وزیراعظم نریندر مودی کے خلاف دوٹوک موقف دلوا کر دکھائے۔پشاور میں میڈیا سے گفتگو کرتے ہوئے بیرسٹر سیف نے سوال اٹھایا کہ نواز شریف وضاحت کریں کہ مودی ان کی کمزوری ہے یا مجبوری؟ انہوں نے الزام عائد کیا کہ جاتی امرا میں دعوتیں کھانے والے کشمیریوں کے قاتل مودی کے خلاف بولنے سے نواز شریف کترا رہے ہیں۔بیرسٹر سیف نے کہا کہ قوم اور افواج پاکستان بھارت کے خلاف ایک صفحے پر متحد ہیں، مگر نواز شریف کی خاموشی اس بات کا ثبوت ہے کہ وہ اور مودی ایک پیج پر ہیں۔ انہوں نے مزید کہا کہ نواز شریف اور ان کے ایجنٹ مودی کے خلاف نہ بول کر پاکستان کی متحد قوم اور افواج کے حوصلے پست کرنے کی کوشش کر رہے ہیں لیکن پی ٹی آئی اور فوج مودی کے خلاف ایک پیج پر ہیں۔بیرسٹر سیف نے حکومت سے مطالبہ کیا کہ وہ محض بیانات کے بجائے عملی طور پر مودی کے خلاف موقف اپنائے اور اگر واقعی قومی سلامتی عزیز ہے تو پارٹی وابستگی سے بالاتر ہو کر بھارت مخالف بیانیے کو مضبوط کرے۔

کریڈٹ: انڈیپنڈنٹ نیوز پاکستان-آئی این پی