پاکستان میں اضافی شمسی بجلی کے حساب و کتاب کے موجودہ نظام کی جگہ نئے ادائیگی نظام کے نفاذ سے بجلی تقسیم کار اداروں کی آمدنی پر پڑنے والا بوجھ کم ہونے کی توقع ہے تاہم نقصانات، واجبات کی کم وصولی اور نرخوں کے ڈھانچے میں موجود خامیاں بدستور توانائی کے شعبے پر دبا برقرار رکھیں گی۔معاشی ترقی کے قومی ادارے کی ایک تحقیقی رپورٹ کے مطابق مالی سال 2024-25 میں گھریلو شمسی نظاموں سے قومی گرڈ کو فراہم کی جانے والی بجلی 1,997.33 گیگاواٹ گھنٹے تک پہنچ گئی۔ موجودہ نظام کے تحت اس بجلی کی مالیت کے باعث تقسیم کار اداروں کو تقریبا 52.93 ارب روپے کی آمدنی کا سامنا تھا جبکہ نئے نظام میں یہ بوجھ کم ہو کر 21.97 ارب روپے رہ جائے گا، یعنی تقریبا 31 ارب روپے کی کمی متوقع ہے۔نئے ضوابط کے تحت شمسی صارفین کو اضافی بجلی کے بدلے پہلے کے مقابلے میں کم معاوضہ ملے گا۔ سابقہ نظام میں اضافی بجلی تقریبا 25 سے 26 روپے فی یونٹ کے حساب سے شمار کی جاتی تھی جس سے صارفین اپنی استعمال شدہ بجلی کا تقریبا برابر حساب پورا کر لیتے تھے۔ اب اضافی بجلی کی خریداری قومی اوسط توانائی خرید نرخ، یعنی تقریبا 10 سے 11 روپے فی یونٹ پر ہوگی۔رپورٹ کے مطابق اس تبدیلی کے نتیجے میں گھریلو شمسی نظاموں پر سرمایہ کاری کی واپسی کا دورانیہ بڑھ جائے گا۔ ایک عام 10 کلوواٹ رہائشی شمسی نظام، جس کی لاگت پہلے چار سے پانچ سال میں پوری ہو جاتی تھی، اب سات سے نو سال میں پوری ہونے کا امکان ہے۔تحقیق میں بتایا گیا ہے کہ بجلی کے بڑھتے نرخوں اور غیر یقینی فراہمی کے باعث پاکستان میں چھتوں پر نصب شمسی نظاموں کا استعمال تیزی سے بڑھا ہے۔

ایسے نظاموں کی مجموعی صلاحیت 5 گیگاواٹ سے تجاوز کر چکی ہے جبکہ آزاد اور اندرونی استعمال والے نظام شامل کیے جائیں تو یہ استعداد اس سے کہیں زیادہ بنتی ہے۔ کئی شہری علاقوں میں بجلی کے نرخ 35 سے 40 روپے فی یونٹ تک پہنچ چکے ہیں جس نے شمسی توانائی کو ایک پرکشش متبادل بنا دیا ہے۔تاہم رپورٹ میں خبردار کیا گیا ہے کہ شمسی توانائی کے پھیلا کو تقسیم کار اداروں کی مالی مشکلات کی واحد وجہ قرار نہیں دیا جا سکتا۔ تحقیق کے مطابق ان اداروں کی مالی مشکلات کی بنیادی وجوہات توانائی کا ضیاع، بجلی چوری، بلوں کی کم وصولی، سرمایہ کاری میں تاخیر اور نرخوں کے نظام میں موجود خامیاں ہیں۔ سب سے زیادہ دبا کا شکار ادارہ بلوچستان کا بجلی تقسیم کار ادارہ قرار پایا جس کے بعد سندھ اور خیبر پختونخوا کے بعض ادارے شامل ہیں۔ دوسری جانب لاہور کا تقسیم کار ادارہ اگرچہ شمسی بجلی کی سب سے زیادہ برآمدات رکھتا ہے، پھر بھی اس کا دبا اشاریہ نسبتا کم رہا جس سے ظاہر ہوتا ہے کہ صرف شمسی توانائی کا بڑھتا استعمال مالی بحران کی مکمل وضاحت نہیں کرتا۔رپورٹ میں یہ بھی کہا گیا ہے کہ نئے ادائیگی نظام کے بعد شمسی صارفین بیٹریوں اور مشترکہ توانائی نظاموں میں زیادہ سرمایہ کاری کر سکتے ہیں تاکہ اضافی بجلی گرڈ میں دینے کے بجائے خود استعمال کی جا سکے۔

اس سے تقسیم کار اداروں پر فوری مالی دبا کم ہوگا لیکن مستقبل میں ان کی بجلی فروخت بھی متاثر ہو سکتی ہے۔تحقیق کے مطابق موجودہ نظام کے باعث بجلی کے فی یونٹ استعداد اخراجات میں 10 پیسے سے 50 پیسے تک اضافہ ہوا جس نے پہلے سے کمزور تقسیمی نظام پر مزید دبا ڈالا۔رپورٹ میں سفارش کی گئی ہے کہ شمسی شعبے میں اصلاحات کے ساتھ ساتھ تقسیم کار اداروں کے نقصانات اور وصولیوں کے مسائل کم کیے جائیں، اضافی بجلی کی قیمت کے تعین کے لیے شفاف اور قابلِ پیش گوئی طریقہ کار اپنایا جائے اور شمسی توانائی کی توسیع کو مقامی سطح کی منصوبہ بندی، بجلی کے نیٹ ورک کی بہتری اور بیٹری پر مبنی نظاموں کی تیاری کے ساتھ مربوط کیا جائے۔رپورٹ کے مطابق اگرچہ نیا ادائیگی نظام قلیل مدت میں مالی ریلیف فراہم کر سکتا ہے لیکن جب تک نقصانات، کم وصولیوں، انتظامی کمزوریوں اور مستقل اخراجات کی وصولی کے مسائل حل نہیں ہوتے، پاکستان کے بجلی تقسیمی شعبے کا مالی دبا برقرار رہے گا۔

کریڈٹ: انڈیپنڈنٹ نیوز پاکستان-آئی این پی ویلتھ پاک