وزیر اعظم محمد شہباز شریف نے وزیر اعظم لیپ ٹاپ سکیم میں جون 2026 تک توسیع کر دی ہے۔پی ایم یوتھ پروگرام کے ایک سینئر عہدیدار نے ویلتھ پاکستان کو بتایا کہ اس پروگرام کی ابتدائی طور پر 2025 تک منظوری دی گئی تھی لیکن وزیراعظم نے اسے جون 2026 تک بڑھا دیا ہے۔اس اسکیم کے تحت اب تک تقریبا6 لاکھ لیپ ٹاپ تین مراحل میں تقسیم کیے جا چکے ہیں، اور حکومت نے گزشتہ ماہ مزیدایک لاکھ لیپ ٹاپ تقسیم کرنے کا اعلان کیا تھا۔ طلبا کا انتخاب ان کی متعلقہ یونیورسٹیوں اور ملک بھر میں ڈگری دینے والے اداروں سے بیک وقت کیا جاتا ہے۔پی سی ون میں اسکیم کی کل لاگت کا تخمینہ تقریبا 16 ارب روپے لگایا گیا تھا۔ویلتھ پاکستان کے پاس دستیاب دستاویزات کے مطابق ملک کے دیگر خطوں کے مقابلے میں پنجاب سے سب سے زیادہ طلبا کا انتخاب کیا گیا ہے۔کل ایک لاکھ لیپ ٹاپس میں سے پنجاب کی یونیورسٹیوں کے طلبا نے 30,862 لیپ ٹاپ حاصل کیے، اس کے بعد بلوچستان نے 18,000 لیپ ٹاپس، سندھ نے 16,006 لیپ ٹاپس، خیبرپختونخوا نے 14,440 لیپ ٹاپس، فیڈرل کے طلبا نے 72،78 لیپ ٹاپس حاصل کیے

جبکہ گلگت بلتستان میں 727 لیپ ٹاپس تقسیم کیے گئے۔مزید برآں، علامہ اقبال اوپن یونیورسٹی کے طلبا کو اسکیم کے تحت 5000 لیپ ٹاپس کا علیحدہ کوٹہ مختص کیا گیا تھا۔اوپن یونیورسٹی کے ملک گیر فاصلاتی تعلیم کے نظام کو دیکھتے ہوئے یونیورسٹی نے اپنے اندراج شدہ سیکھنے والوں کے لیے مساوی رسائی کو یقینی بنانے کے لیے مخصوص نشستیں حاصل کیں۔ یہ 5,000 لیپ ٹاپ ایک تقریب کے دوران تقسیم کیے گئے جس کا اہتمام وزیر اعظم لیپ ٹاپ سکیم کے فیز فور کے تحت ایک لاکھ لیپ ٹاپ مختص کرنے کے اعلان کے لیے کیا گیا تھا۔معیار کے مطابق پبلک سیکٹر یونیورسٹیوں میں داخلہ لینے والا ہر طالب علم صرف ایک لیپ ٹاپ کے لیے درخواست دینے کا اہل تھا۔ انتخاب ایچ ای سی کے آن لائن سسٹم کے ذریعے تصدیق شدہ تعلیمی میرٹ کی بنیاد پر کیا گیا تھا۔ایچ ای سی کے ایک اہلکار نے کہا کہ سکیم کی توسیع ملک میں ڈیجیٹل رسائی کو فروغ دینے اور اعلی تعلیم کی حمایت کے لیے حکومت کے عزم کو اجاگر کرتی ہے۔

کالج کے طلبا کی ایک بڑی تعداد لیپ ٹاپ کے متحمل نہیں ہوسکتی ہے جبکہ یہ طلبا کی آن لائن کلاسز میں شرکت، تحقیق اور تعلیمی منصوبوں کو مکمل کرنا ایک بنیادی ضرورت بن گیا ہے، خاص طور پر سیلاب اور کیمپس کی توسیع کی وجہ سے ہونے والی رکاوٹوں کے دوران اسکی زیادہ ضرورت ہے۔انہوں نے کہا کہ وزیر اعظم شہباز شریف اس بات پر یقین رکھتے ہیں کہ ڈیجیٹل ٹولز تک رسائی کو بہتر بنانا ایک مسابقتی افرادی قوت کی تعمیر کے لیے ضروری ہے جو قومی ترقی میں کردار ادا کرنے کے قابل ہو۔ایک سوال کے جواب میں، انہوں نے فیز فور کے تحت لیپ ٹاپ کی تقسیم میں تاخیر کا دفاع کرتے ہوئے وضاحت کی کہ یہ انتظامی عوامل کی وجہ سے ہوا، جیسے کہ کئی یونیورسٹیوں میں گرمیوں کی چھٹیاں اور آلات کو دور دراز علاقوں تک پہنچانے میں لاجسٹک چیلنجزہیں تاہم انہوں نے دعوی کیا کہ اب یہ مسئلہ حل ہو گیا ہے۔

کریڈٹ: انڈیپنڈنٹ نیوز پاکستان-آئی این پی ویلتھ پاک