اسٹیٹ بینک کی زری پالیسی کمیٹی کا اجلاس 5مئی (پیر کو) طلب کرلیا گیا ، جس میں شرح سود میں کمی کا امکان ہے۔مرکزی بینک کی جانب سے جاری اعلا میہ کے مطابق بینک دولت پاکستان کی زری پالیسی کمیٹی(ایم پی سی) کا اجلاس بروز پیر 5 مئی 2025 کو منعقد ہوگا، جس میں آئندہ 2 ماہ کے لیے زری پالیسی کے بارے میں فیصلہ کیا جائے گا ۔ اسٹیٹ بینک اسی روز تفصیلی زری پالیسی بیان بھی جاری کرے گا۔اقتصادی ماہرین کا کہنا ہے کہ مرکزی بینک کے پاس دسمبر 2025 تک شرح سود میں مزید 200 بیسز پوائنٹس کم کرنے کی گنجائش ہے، جس کی وجہ سے امید ہے کہ پیر کے روز ہونے والے اجلاس میں شرح سود میں کمی کی جا سکتی ہے۔ دوسری جانب اسٹیٹ بینک نے یوم مزدور کے موقع پر آج یکم مئی کو کمرشل بینکوں اور مالیاتی اداروں کی تعطیل کا اعلان کیا ہے۔ ترجمان کے مطابق بینک دولت پاکستان جمعرات یکم مئی 2025 یومِ مزدور کے موقع پر عام تعطیل کے سبب بند رہے گا جس کے سبب کمرشل بینک اور مالیاتی ادارے بھی بند رہیں گے۔

کریڈٹ: انڈیپنڈنٹ نیوز پاکستان-آئی این پی