خیبرپختونخوا حکومت نے صوبے بھر کے 1500 اسکولوں کو پبلک پرائیویٹ پارٹنرشپ ماڈل کے تحت نجی شعبے کے حوالے کرنے کا فیصلہ کیا ہے، جبکہ ایلیمنٹری ایجوکیشن فائونڈیشن کے ذریعے 200 نئے اسکول قائم کیے جائیں گے۔ صوبائی وزیر تعلیم فیصل ترکئی نے پریس کانفرنس میں بتایا کہ آئندہ مالی سال 26-2025 کیلئے 364 ارب روپے کا تعلیمی بجٹ مختص کیا گیا ہے، جس میں 29 نئے منصوبے شامل کیے گئے ہیں۔ انہوں نے مزید بتایا کہ 10 تاریخی اسکولوں کی بحالی کیلئے بھی خصوصی فنڈ رکھا گیا ہے۔فیصل ترکئی نے کہا کہ 12 سو ملین روپے تعلیم ایمرجنسی، اسمارٹ کلاس رومز اور اضافی کمروں کی تعمیر کیلئے رکھے گئے ہیں۔ انہوں نے تسلیم کیا کہ آئوٹ آف اسکول بچوں کی تعداد اب بھی ایک بڑا مسئلہ ہے، تاہم ہر سال ان بچوں کو اسکول لانے کی بھرپور مہم جاری ہے۔

صوبائی وزیر کا کہنا تھا کہ ضم اضلاع کے اسکولوں میں بنیادی سہولیات کی شدید کمی ہے، جسے دور کرنے کیلئے وہاں پرائمری اسکولوں میں 500 نئے کمروں کی تعمیر کی جائے گی۔فیصل ترکئی کے مطابق تمام پرائمری اسکولوں میں مفت کتابوں کے ساتھ بیگ اور اسٹیشنری فراہم کی جا رہی ہے، جبکہ تعلیم کارڈ اسکیم پر بھی کام جاری ہے۔ انہوں نے وعدہ کیا کہ رواں سال کے اختتام تک تمام اسکولوں میں 100 فیصد فرنیچر کی فراہمی مکمل کی جائے گی۔صوبے کے ہائی اور ہائیر سیکنڈری اسکولوں میں کمپیوٹر لیبز اور انٹرنیٹ کی سہولت فراہم کرنے کا بھی منصوبہ زیرِ عمل ہے۔وزیر تعلیم کے مطابق اسکولوں میں مانیٹرنگ کے نظام کی بہتری سے اساتذہ کی حاضری میں 6 فیصد اضافہ ہوا ہے۔فیصل ترکئی کا کہنا تھا کہ تعلیم کا فروغ حکومت کی اولین ترجیح ہے اور ہر ممکن کوشش کی جا رہی ہے کہ خیبرپختونخوا کا ہر بچہ تعلیم یافتہ ہو۔

کریڈٹ: انڈیپنڈنٹ نیوز پاکستان-آئی این پی