کراچی میں فائرنگ کے مختلف واقعات میں تین افراد جاں بحق جبکہ بچی سمیت 4 افراد زخمی ہوگئے جبکہ پولیس سے مبینہ مقابلوں کے دوران 2 ملزمان ہلاک ہوگئے۔ تفصیل کے مطابق ناظم آباد گول مارکیٹ میں گورنمنٹ گرلز ہائیر سیکنڈری اسکول کے گیٹ پر فائرنگ کا واقعہ پیش آیا جس کے نتیجے میں باپ جاں بحق اور بچی زخمی ہوگئی۔ریسکیو کے مطابق بچی کی عمر 10 سال ہے جو اسکول یونیفارم میں ملبوس تھی، فائرنگ کی اطلاع ملنے پر پولیس جائے وقوعہ پر پہنچ گئی۔اسکول انتظامیہ کے مطابق باپ اپنی بیٹی کو اسکول چھوڑنے آیا تھا، اسکول کے گیٹ پر ہی فائرنگ کا واقعہ پیش آیا، بچی کا نیا ایڈمیشن ہوا تھا،اس لیے زیادہ معلومات نہیں۔ایس ایچ او اور ڈی ایس پی کرائم سین پر پہنچ گئے، پولیس کے مطابق قتل دشمنی کی بنا پر کیا گیا، جاں بحق شخص راشد اسٹیٹ ایجنسی چلاتا تھا، ادھیڑ عمر قاتل اسکول کے باہر کھڑا انتظار کررہا تھا،راشد جیسے ہی اپنی بیٹی کو اسکول چھوڑنے آیا، ملزم نے موٹر سائیکل سے اتر کر پہلی گولی بچی اور دوسری باپ کے سر پر ماری۔پولیس کے مطابق فائرنگ کرنے والے شخص کی سفید داڑھی تھی، سی سی ٹی وی فوٹیج اور دیگر کے ذریعے ملزم کی تلاش کر رہے ہیں۔دوسری جانب نیپاچورنگی راشدمنہاس روڈ پر فائرنگ سے ایک شخص جاں بحق ہوگیا، پولیس کے مطابق مقتول کی شناخت کامران عباس کے نام سے ہوئی ہے۔

پولیس حکام کے مطابق مبینہ طور پر موٹرسائیکل سوار ملزمان نے ڈکیتی کے دوران مزاحمت پر موٹرسائیکل سوار کو گولی ماری، جائے وقوعہ سے شواہد اکھٹے کیے جا رہے ہیں اوراطراف کی سی سی ٹی وی فوٹیج بھی حاصل کی جا رہی ہے۔دریں اثنا، نارتھ ناظم آباد میں ڈاکوں نے موٹرسائیکل چھیننے کے دوران فائرنگ کرکے 2 بھائیوں کو زخمی کردیا اور فرار ہوگئے۔ ادھر کورنگی کوسٹ گارڈ چورنگی کے قریب نورانی بستی میں ہوا جہاں جھگڑے کے دوران تیز دھار آلے کے وار سے ایک نوجوان جان کی بازی ہار گیا۔چھیپا حکام کے مطابق جاں بحق شخص کی شناخت بلال کے نام سے ہوئی ہے، جس کی لاش کو جناح اسپتال منتقل کر دیا گیا ہے۔ ایک اور واقعے میں ایک اور شخص عمر زمان زخمی ہوا، جسے فوری طبی امداد کے لیے عباسی شہید اسپتال منتقل کیا گیا۔ پولیس کے مطابق واقعے کی نوعیت گھریلو جھگڑے یا ذاتی رنجش کی بنیاد پر معلوم ہو رہی ہے، تاہم تحقیقات جاری ہیں۔ علاوہ ازیں، ایف بی ایریا بلاک 14 سے بوری میں بند تشدد زدہ لاش ملی، پولیس کے مطابق مقتول خاور انجم حکیم اور آبائی تعلق میرپور خاص سے تھا، خاور انجم کو اس کے بیٹوں نے تشدد اور گلا گھونٹ کر قتل کیا۔پولیس کے مطابق ملزمان لاش کو بوری میں بند کرکے موٹرسائیکل پر ٹھکانے لگانے لے جارہے تھے، راستے میں پولیس نے روک کر بوری کھولی تو لاش مل گئی، مقتول کے دونوں بیٹوں ابراہیم اور افضل کو گرفتار کرلیا گیا ہے۔پولیس کے مطابق مقتول خاور انجم اپنے بیٹوں کے ساتھ مدرسہ میں ایک کمرے میں رہائش پذیر تھا، واقعے کے اصل محرکات جاننے کے لیے مزید تفتیش جاری ہے۔

ادھر کراچی کے علاقے ایف بی ایریا میں باپ کی لاش بوری میں ڈال کر لے جانے والے بیٹے پکڑے گئے۔پولیس حکام کے مطابق باپ کو قتل کر کے لاش ٹھکانے لگانے کی کوشش کرنے والے 2 بیٹے گرفتار کیے گئے ہیں، ملزمان بوری بند لاش موٹر سائیکل پر رکھ کر لے جا رہے تھے۔پولیس حکام نے بتایا کہ ایف بی ایریا بلاک 14 میں اہلکاروں نے موٹر سائیکل روک کر تلاشی لی تو بوری میں سے لاش نکل آئی، جس پر دونوں ملزمان کو گرفتار کیا گیا۔ گرفتار ملزمان سے تفتیش کے دوران معلوم ہوا کہ 60 سالہ خاور انجم کو اس کے بیٹوں نے تشدد کر کے قتل کیا، مقتول پیشے کے اعتبار سے حکیم تھا، اور اپنے بیٹوں کے ساتھ مدرسے میں رہائش پذیر تھا۔پولیس کا کہنا ہے کہ گرفتار ملزمان کے نام ابراہیم اور افضل ہیں، جن سے مزید تفتیش کی جا رہی ہے۔ دریں اثنا لانڈھی شیر پاکالونی میں ڈکیتی کے دوران ملزم اپنے ہی ساتھی کی فائرنگ سے ہلاک ہوگیا، پولیس کے مطابق دو ملزمان گھر میں لوٹ مار کرنے داخل ہوئے، ملزمان کو دیکھ کر گھر کے افراد نے شور مچایا، تو اہل محلہ جمع ہوگئے۔پولیس کے مطابق ملزمان نے فرار ہوتے ہوئے فائرنگ کردی، جس سے ان کا ساتھی ہلاک اور خاتون زخمی ہوئی، ہلاک ملزم سے اسلحہ اور لوٹا ہوا سامان برآمد کرلیا گیا۔دریں اثنا، جہاں آباد میں پولیس کے سرچ آپریشن کے دوران ملزمان نے پولیس پر فائرنگ کردی، جوابی فائرنگ سے ایک ملزم ہلاک اور اس کا ساتھی فرار ہوگیا، پولیس کے مطابق ہلاک ملزم سے اسلحہ اور موٹرسائیکل برآمد کرلی گئی ہے۔

کریڈٹ: انڈیپنڈنٹ نیوز پاکستان-آئی این پی