لاہور کے جنرل اسپتال سے اغوا کیا گیا نومولود بچہ تیسرے روز بازیاب کرا لیا گیا۔متاثرہ والدین کو 10 سال بعد اولاد نرینہ ملی تھی جبکہ اغوا کار خاتون بے اولاد تھی جس نے طلاق کے ڈر سے بچہ چوری کیا تھا۔یہ نومولود بچہ جنرل اسپتال کے نرسری وارڈ سے یکم ستمبر کو اغوا کیا گیا تھا۔واقعے کے بعد فوٹیج میں دو خواتین پر شک ہونے کے بعد محکمہ صحت نے وارڈ کے عملے کو معطل کیا تھا اور پولیس نے بھی بچے کی تلاش شروع کردی تھی۔واقعے کے دو دن بعد بچہ کماہاں گائوں سے ملا۔ایس پی انویسٹی گیشن ماڈل ٹائون ڈاکٹر ایاز حسین نے ایم ایس اسپتال کے ہمراہ پریس کانفرنس میں بتایا کہ سی سی ٹی وی کی مدد سے کماہاں گائوں تک پہنچے اور گھر گھر تلاشی لی، ملزمہ نے بچہ صندوق میں چھپا رکھا تھا۔بعدازاں بچہ واپس ملنے پر والدین خوشی سے نہال ہوگئے جن کا کہنا تھا کہ وہ بچہ اغوا ہوا تو تین دن سو نہ سکے، پولیس نے اچھا کام کیا، خدا کا شکر بجا لاتے ہیں۔ڈاکٹروں کے مطابق بچہ صحت مند ہے تاہم دو دن مزید اسپتال میں رکھ کر اس کی دیکھ بھال کی جائے گی۔

کریڈٹ: انڈیپنڈنٹ نیوز پاکستان-آئی این پی