ملک کے مختلف علاقوں میں ٹریفک کے المناک حادثات میں بچوں سمیت کم از کم 11افراد جاں بحق اور 5زخمی ہوگئے، تفصیل کے مطابق شکارپور میں مزدا گاڑی نے سوئے ہوئے افراد کو کچل دیا جس کے باعث 5 بچوں سمیت 8 افراد جاں بحق جبکہ 5 شدید زخمی ہوگئے۔پولیس کا کہنا ہے کہ آلو اور پیاز سے بھری ہوئی مزدا گاڑی تیز رفتاری کے باعث بجلی کے پول سے ٹکرا کر سڑک کنارے سوئے افراد پر چڑھ دوڑی، دو بچوں سمیت 8 افراد موقع پر جاں بحق ہوگئے، حادثے کی اطلاع پر پولیس کے اعلی حکام اور بھاری نفری موقع پر پہنچ گئی۔شکارپور پولیس کے مطابق کندن چورنگی میں پیش آنے والا یہ حادثہ کئی گھروں کے چراغ بجھا گیا، جاں بحق ہونے والوں میں 38 سالہ گوبھی، 40 سالہ رابعہ، 10 سالہ ریما، 8 سالہ رشیدہ، 8 سالہ سمعیہ، 12 سالہ انعام اللہ، 6 سالہ پیاری اور 17 سالہ منی شامل ہیں۔پولیس حکام کے مطابق زخمیوں میں سلیمان خمیسو، اویس اور وجے شامل ہے، افسوسناک حادثے کے بعد علاقے میں سوگ کا سماں ہے، ہر آنکھ اشکبار ہے، پولیس کے مطابق حادثے کا ذمہ دار مزدا ڈرائیور موقع سے فرار ہوگیا۔ریسکیو اداروں نے لاشوں اور زخمیوں کو فوری طور پر ہسپتال منتقل کر دیا، زخمیوں کی حالت بھی تشویشناک بتائی گئی ہے۔

ابتدائی طور پر حادثہ تیز رفتاری کا نتیجہ معلوم ہوتا ہے، تاہم ٹرک کو تحویل میں لیکر تحقیقات کا آغاز کر دیا گیا ۔ دریں اثناراولپنڈی میں مری روڈ رحمان آباد کے قریب تیز رفتار ڈمپر نے موٹر سائیکل کو روند ڈالا، حادثے میں 2 نوجوان موقع پر جاں بحق ہوگئے۔ریسکیو حکام کا کہنا ہے کہ افسوسناک حادثے میں 2 نوجوان موقع پر جاں بحق ہوگئے جبکہ ایک شدید زخمی ہے، لاشوں اور زخمیوں کو اسپتال منتقل کردیا گیا ہے۔ریسکیو حکام کے مطابق جاں بحق ہونے والوں کی شناخت شہزاد اور خرم حمید کے نام سے ہوئی ہے، موٹر سائیکل بریک لگانے کے باعث سلپ ہوئی اور تیز رفتار ڈمپر اوپر سے گزر گیا۔ ادھر بہاولنگر میں تیز رفتار ٹریکٹر ٹرالی تلے کچلے جانے سے 10 سالہ لڑکا جاں بحق ہوگیا۔حادثہ نواحی علاقے چک بوٹیاں والا میں پیش آیا، حادثے کی اطلاع پر پولیس کی بھاری نفری اور امدادی ٹیمیں بھی موقع پرپہنچ گئیں، جاں بحق ہونے والے لڑکے کی لاش کو ضروری کارروائی کے لئے ہسپتال منتقل کردیا گیا۔ریسکیو ذرائع کے مطابق جاں بحق ہونے والے لڑکے کی شناخت علی حیدر کے نام سے ہوئی ہے، پولیس نے واقعہ کی تحقیقات شروع کردی۔

کریڈٹ: انڈیپنڈنٹ نیوز پاکستان-آئی این پی