وزیراعظم شہباز شریف نے اسرائیلی انتہا پسند وزیر برائے قومی سلامتی اتمار بن گویر کی مسجد اقصی پر مسلح دھاوے کی شدید مذمت کرتے ہوئے کہا ہے کہ یہ بین الاقوامی قانون کی خلاف ورزی اور مشرق وسطی میں قیام امن کی کوششوں کے لیے سنگین خطرہ ہے جبکہ یہ انسانیت کے اجتماعی ضمیر پر حملہ ہے۔سماجی رابطوں کے نیٹ ورک ایکس (سابقہ ٹوئٹر)پر ایک بیان میں وزیراعظم شہباز شریف نے کہا کہ اسلام کے مقدس ترین مقامات میں سے ایک کی یہ بے حرمتی نہ صرف ایک ارب سے زائد مسلمانوں کے عقیدے کی توہین ہے بلکہ بین الاقوامی قانون اور انسانیت کے اجتماعی ضمیر پر بھی براہ راست حملہ ہے۔وزیراعظم شہباز شریف نے کہا کہ قابض طاقت کی طرف سے اس طرح کی منظم اشتعال انگیزیاں امن کے امکانات کو نقصان پہنچاتی ہیں، اسرائیل کے بیشرمانہ اقدامات جان بوجھ کر فلسطین اور وسیع خطے میں تنا کو ہوا دے رہے ہیں اور مشرق وسطی کو مزید عدم استحکام اور تنازعات کے قریب دھکیل رہے ہیں۔ وزیراعظم نے ایک بار پھر بین الاقوامی قانون اور اقوام متحدہ کی متعلقہ قراردادوں کے مطابق غزہ میں فوری جنگ بندی، تمام جارحیت کے خاتمے اور ایک قابل اعتماد امن عمل کی کوششوں پر زور دیا ہے۔

کریڈٹ: انڈیپنڈنٹ نیوز پاکستان-آئی این پی