پاکستان نے غزہ میں اسرائیلی افواج کی جانب سے اسپتال پر بمباری کی شدید مذمت کرتے ہوئے مطالبہ کیا ہے کہ عالمی برادری اسرائیلی جارحیت کے خلاف موثر آواز بلند کرے۔ترجمان دفتر خارجہ نے جاری بیان یمں کہا ہے کہ غزہ میں طبی سہولیات کے مراکز کو نشانہ بنانا عالمی انسانی قوانین کی صریح خلاف ورزی ہے۔ یہ افسوسناک حملہ مسیحی برادری کے اہم مذہبی تہوار "پام سنڈے" کے موقع پر کیا گیا جو انسانیت کے حوالے سے سنگین بے حسی کو ظاہر کرتا ہے۔دفتر خارجہ کا کہنا ہے کہ پاکستان اسرائیلی بربریت کی فوری روک تھام کا مطالبہ کرتا ہے۔ ترجمان نے کہا کہ اسرائیلی جارحیت کے باعث معصوم اور نہتے خواتین اور بچوں سمیت بے گناہ فلسطینی شہری جاں بحق ہو چکے ہیں۔

انہوں نے مزید کہا کہ اسرائیلی حملوں نے غزہ کے صحت کے نظام اور میڈیکل کئیر کو مکمل طور پر تباہ کر دیا ہے، جس کے نتیجے میں شدید بیمار افراد بنیادی طبی سہولیات سے محروم ہو گئے ہیں۔غزہ کا نظام صحت مفلوج ہوچکا ہے، مریض بنیادی علاج سے محروم ہیں۔ترجمان کا مزید کہنا تھا کہ انسانی امدادپرپابندی تکالیف بڑھانے اورتنازع کوطول دینے کی سوچی سمجھی حکمت عملی ہے،اسرائیلی افواج کی جارحیت فی الفور روکی جائے۔ دفتر خارجہ نے کہا کہ پاکستان فلسطین کے مسئلے کے دوریاستی حل کی حمایت کرتاہے، فلسطینی ریاست کا قیام1967سے پہلے کی سرحدوں کے مطابق عمل میں لایا جائے، دارالحکومت القدس الشریف ہونا چاہیے۔ ترجمان نے مطالبہ کیا عالمی برادری اسرائیل کو جوابدہ بنائے اور فلسطینی شہریوں کی حفاظت کو یقینی بنائے۔

کریڈٹ: انڈیپنڈنٹ نیوز پاکستان-آئی این پی