وزیراعظم شہباز شریف نے امریکی صدر کو امن کا علمبردارقراردیتے ہوئے کہا ہے کہ صدر ڈونلڈ ٹرمپ دنیا بھر میں تنازعات کے خاتمے کیلئے مخلصانہ کوششوں میں مصروف ہیں، ان کی قیادت میں پاک امریکا تعلقات مزید مضبوط ہوں گے۔وزیراعظم آفس کی جانب سے جاری اعلامیے میں کہا گیا ہے کہ وزیراعظم شہباز شریف اور فیلڈ مارشل عاصم منیر کی امریکا کے صدر ڈونلڈ ٹرمپ سے جمعہ کو وائٹ ہائوس میں ملاقات گرمجوشی اور خوشگوار ماحول میں ہوئی۔ امریکی صدر ڈونلڈ ٹرمپ نیوزیراعظم شہبازشریف اورآرمی چیف فیلڈ مارشل عاصم منیر کا پرجوش خیر مقدم کیا، وائٹ ہائوس کے اوول آفس کے دوستانہ ماحول میں ہونے والی بیٹھک ایک گھنٹہ 20 منٹ تک جاری رہی، امریکی نائب صدر جے ڈی وینس اور سیکریٹری خارجہ مارکو روبیو نے بھی ملاقات میں شرکت کی۔ اعلامیے کے مطابق وزیراعظم شہباز شریف نے صدر ٹرمپ کی تعریف کی اور انہیں امن کا علمبردار قرار دیا جو دنیا بھر میں تنازعات کے خاتمے کیلئے مخلصانہ کوششوں میں مصروف ہیں۔

ان کی قیادت میں پاک امریکا تعلقات مزید مضبوط ہوں گے۔وزیراعظم نے صدر ٹرمپ کو جرات مندانہ، دلیرانہ اور فیصلہ کن قیادت پر سراہا جنہوں نے پاکستان اور بھارت کے درمیان جنگ بندی میں کردار ادا کیا اور جنوبی ایشیا میں ایک بڑی تباہی کو ٹالنے میں مدد فراہم کی ۔ مشرق وسطی کی صورتحال پر تبادلہ خیال کرتے ہوئے وزیراعظم نے غزہ میں جنگ کے فوری خاتمے کیلئے صدر ٹرمپ کی کوششوں کو سراہا۔ وزیراعظم نے بالخصوص نیویارک میں مسلم دنیا کے اہم رہنمائوں کو مدعو کر کے امن کے قیام کیلئے جامع مشاورت کو قابلِ تحسین قرار دیا۔ملاقات میں وزیراعظم نے پاکستان اور امریکہ کے درمیان طے پانے والے ٹیرف معاہدے پر بھی صدر ٹرمپ کا شکریہ ادا کیا اور انہیں دورہ پاکستان کی دعوت بھی دی ۔

اس موقع پر وزیراعظم نے پاکستان اور امریکا کے درمیان تجارتی تعلقات میں بہتری پر اطمینان کا اظہار کیا اور امریکی کمپنیوں کو پاکستان کی زراعت، آئی ٹی، کان کنی اور معدنیات اور توانائی کے شعبوں میں سرمایہ کاری کی دعوت دی ، شہباز شریف نے امید ظاہر کی کہ ٹرمپ کی قیادت میں باہمی تعلقات مزید مضبوط ہوں گے اور یہ روابط دونوں ممالک کیلئے یکساں مفید ہوں گے۔دونوں رہنمائوں نے انسداد دہشت گردی میں تعاون سمیت علاقائی سلامتی پر بھی تبادلہ خیال کیا۔ صدر ٹرمپ کی جانب سے انسداد دہشت گردی کے معاملے میں پاکستان کے کردار کی عوامی توثیق پر وزیراعظم نے شکریہ ادا کیا اور سکیورٹی اور انٹیلیجنس کے شعبوں میں تعاون کو مزید بڑھانے پر زور دیا۔

کریڈٹ: انڈیپنڈنٹ نیوز پاکستان-آئی این پی