پاکستان کا مقصد جنوبی کوریا کے تعاون سے چلنے والے منصوبے کے تحت 2027 تک ایروپونک ٹیکنالوجی کے ذریعے سالانہ 160,000 ٹن وائرس سے پاک تصدیق شدہ بیج تیار کرکے آلو کے درآمدی بیجوں پر انحصار کم کرنا ہے۔کوریا پارٹنرشپ فار انوویشن آف ایگریکلچرکے پروجیکٹ کوآرڈینیٹر ڈاکٹر عیش محمد نے ویلتھ پاکستان کو بتایا کہ یہ اقدام کوریا پارٹنرشپ فار انوویشن آف ایگریکلچر کے ساتھ پانچ سالہ تعاون، 2023 میں شروع کیا گیا تھا جس کا مقصد 2027 میں پاکستان کی آلو کے بیج کی کل طلب کا 30 فیصد پورا کرنا تھا۔تاہم، 30 فیصد خود کفالت کا ہدف کم کر کے 20 فیصد کر دیا گیا ہے کیونکہ 2023 کے مقابلے میں آلو پیدا کرنے والے رقبے میں اب اضافہ ہوا ہے۔اس منصوبے میں پہلے ہی نمایاں پیش رفت ہوئی ہے۔ ڈاکٹر عیش کے مطابق 110 ٹن تصدیق شدہ سیڈ آلو 42 کسانوں اور بیج کمپنیوں کو تقسیم کیے جا چکے ہیں۔ کافی بنیادی ڈھانچہ قائم کیا گیا ہے، جس میں ایروپونک گرین ہاسز، 28,000 مربع میٹر پر محیط اسکرین ہاوسز، اور بیج کے معیار کو محفوظ رکھنے کے لیے 400 ٹن کولڈ اسٹوریج کی سہولت شامل ہے۔انہوں نے مزید کہا کہ اس منصوبے نے صلاحیت کی تعمیر، 400 افراد کو تربیت دینے پر بھی توجہ مرکوز کی ہے جن میں فیڈرل سیڈ سرٹیفیکیشن اینڈ رجسٹریشن ڈیپارٹمنٹ کے 30 انسپکٹرز بھی شامل ہیںجن میں سے 17 جنوبی کوریا میں جدید تربیت حاصل کر رہے ہیں۔

ڈاکٹر عیش نے کہا کہ حکومت پاکستان نے اس منصوبے کی طویل مدتی صلاحیت کو تسلیم کیا ہے اور کوریا انٹرنیشنل کوآپریشن ایجنسی سے 2027 کے بعد پیداوار میں اضافہ جاری رکھنے کے لیے فالو اپ پروجیکٹ کی منظوری کی درخواست کی ہے۔ یہ تجویز فی الحال زیر غور ہے، اس سال دسمبر تک فیصلہ متوقع ہے۔اس وقت، ملک کی تقریبا 950,000 ٹن بیج آلو کی سالانہ طلب کا 1-2فیصد 2 سے 3 بلین روپے کی مہنگی درآمدات سے پورا کیا جاتا ہے۔جبکہ ایروپونک گرین ہاوسز سالانہ 450,000 ٹیوبرزاور بیج آلو پیدا کر سکتے ہیں، پراجیکٹ کے نسبتا چھوٹے پیمانے کی وجہ سے درآمدات میں ابھی تک کمی نہیں آئی ہے لیکن پانچ سالوں میں پیداوار بڑھنے سے درآمدات میں کمی آنا شروع ہو جائے گی۔آلو کے بیجوں کی درآمدات کا خاتمہ آلو کے بیج کی مقامی پیداوار میں خود انحصاری کی طرف ایک قدم ہو گا،انہوں نے کہا کہ اچھے معیار کے بیجوں کی کمی نے تاریخی طور پر فصل کی پیداوار کے لیے ایک بڑا چیلنج کھڑا کیا ہے۔پروجیکٹ کے پائیدار نقطہ نظر میں کثیر مرحلہ پروڈکشن سائیکل شامل ہے۔ یہ ٹشو کلچر لیبز میں بیماری سے پاک آلو کے پودے تیار کرنے سے شروع ہوتا ہے۔ اس کے بعد انہیں ایروپونک گرین ہاوسز میں منتقل کیا جاتا ہے اور رجسٹرڈ کسانوں اور بیج کمپنیوں میں تقسیم کرنے سے پہلے اسکرین ہاوسز میں کئی گنا بڑھ جاتا ہے۔

ڈاکٹر عیش نے کہاکہ ان کاشتکاروں کو، بدلے میں، ایک پائیدار اور وسیع پیمانے پر فراہمی کو یقینی بناتے ہوئے، چار نسلوں میں بیج کو ضرب دینے کی ضرورت ہے۔ڈاکٹر عیش نے کہا کہ تصدیق شدہ بیجوں میں کسانوں کی دلچسپی غیر معمولی طور پر زیادہ رہی ہے جس کی مانگ موجودہ رسد سے زیادہ ہے۔بیج کی تقسیم کے عمل کی شفافیت پر زور دیتے ہوئے، انہوں نے کہا کہ اس عمل میں عوامی اشتہارات اور درخواستوں کی بنیاد پر مختص کرنا شامل ہے۔ایروپونک ٹیکنالوجی میں تبدیلی پیداوار اور معیار میں ڈرامائی بہتری پیش کرتی ہے۔ڈاکٹر عیش نے وضاحت کی کہ جب کہ روایتی طریقوں سے فی پودا تقریبا پانچ ٹبر کے بیج نکلتے ہیں، ایک ایروپونیکل طور پر اگایا جانے والا پودا 40 سے 50 ٹبر کے بیج پیدا کر سکتا ہے۔انہوں نے کہایہ اعلی کارکردگی، ٹیکنالوجی کی سالانہ ہزاروں وائرس سے پاک پودے اگانے کی صلاحیت کے ساتھ، پاکستان میں آلو کی پیداوار میں رکاوٹ بننے والے ایک اہم مسئلے کو براہ راست حل کرتی ہے۔ایک اور بڑا فائدہ پانی اور بجلی کا تحفظ ہے جو وسائل کی کمی کا سامنا کرنے والے ملک کے لیے اہم ہے۔

ڈاکٹر عیش نے کہا کہ یہ ایروپونک فارمنگ کو پاکستان کی زرعی ضروریات کے لیے ایک خاص طور پر پائیدار اور موثر حل بناتا ہے۔تقریبا 340,000 ہیکٹر پر آلو کاشت کرنے کے باوجودپاکستان کی پیداوار کم معیار کے گھریلو بیجوں پر انحصار کی وجہ سے متاثر ہے۔ جب کہ ہر سال 15,000 سے 20,000 ٹن بیج درآمد کیے جاتے ہیں، ملک کی تقریبا 950,000 ٹن کی کل ضرورت اعلی معیار کے بیجوں سے پوری نہیں ہوتی کیونکہ بہت سے کسان انہیں برداشت نہیں کر سکتے۔ یہ صورتحال ملک میں آلو کی کم پیداوار میں معاون ہے۔کوریا پارٹنرشپ فار انوویشن آف ایگریکلچرکے ساتھ تعاون فصلوں کی پیداوار بڑھانے، فصل کے بعد ہونے والے نقصانات کو کم کرنے، اور خاص طور پر چھوٹے زمینداروں کے لیے فارم کی آمدنی میں اضافہ کرنے کی ایک وسیع کوشش کا حصہ ہے۔ ڈاکٹر عیش نے کہا کہ بیجوں کی مقامی فراہمی کو مضبوط بنا کرپاکستان غذائی تحفظ کو بہتر بنا سکتا ہے اور مہنگی درآمدات پر اپنا انحصار کم کر سکتا ہے، یہ ایک زیادہ لچکدار زرعی شعبے کی تعمیر کی طرف ایک حکمت عملی اقدام ہے۔

کریڈٹ: انڈیپنڈنٹ نیوز پاکستان-آئی این پی ویلتھ پاک