گوادر ویمن گارمنٹ فیکٹری نے سرکاری اور نجی اداروں سے آرڈرز لینے کی کوششیں تیز کر دیں ،یہ قومی اور ملٹی نیشنل کمپنیوں کے ملازمین کے یونیفارم کے آرڈرز کو پورا کرنے اور ان کی فراہمی کے لئے تیار ہے،فیکٹری گزشتہ چار سالوں سے گوادر پورٹ پر چینی کمپنیوں کے کارکنوں کے لئے یونیفارم تیار کر رہی ہے۔گوادر پرو کے مطابق گوادر ویمن گارمنٹ فیکٹری، جسے گوادر ویمن ڈیولپمنٹ ایمپلائمنٹ سینٹر بھی کہا جاتا ہے، نے گوادر پورٹ پر چار سال کے آپریشن کے بعد سرکاری اور نجی اداروں سے آرڈر حاصل کرنے کی اپنی کوششوں میں اضافہ کر دیا ہے۔ گوادر پرو کے مطابق یہ فیکٹری کراچی میں چینی قونصل یٹ اور چائنا اوورسیز پورٹ ہولڈنگ کمپنی کے تعاون سے قائم کی گئی تھی۔ یہ قومی اور ملٹی نیشنل کمپنیوں کے ملازمین کے تیار کردہ یونیفارم کے آرڈرز کو پورا کرنے اور ان کی فراہمی کے لئے تیار ہے۔ گوادر پرو سے بات کرتے ہوئے فیکٹری کی سپروائزر زیتون عبداللہ نے کہا کہ فیکٹری کی خواتین کارکنوں نے پیداواری معیار پر پورا اترنے کے لئے ضروری مہارتیں حاصل کی ہیں۔ انہوں نے کہا کہ فیکٹری گزشتہ چار سالوں سے گوادر پورٹ پر چینی کمپنیوں کے کارکنوں کے لئے یونیفارم تیار کر رہی ہے۔ انہوں نے مزید کہا کہ فیکٹری آمدنی بڑھانے کے لئے کڑھائی پر توجہ دے رہی ہے اور انہوں نے گوادر گارمنٹ فیکٹری کو خطے میں خواتین کو بااختیار بنانے کا ایک کامیاب کیس قرار دیا۔

گوادر پرو کے مطابق زیتون نے فیکٹری میں کیریئر کے مواقع پر تبصرہ کرتے ہوئے کہا کہ سلائی گوادر میں تخلیقی خواتین کے لئے ایک قابل عمل کیریئر کا راستہ پیش کرتی ہے جو کپڑے کے کام میں مہارت رکھتی ہیں۔ انہوں نے اس بات پر زور دیا کہ فیکٹری میں کام کرنے والی خواتین پاکستان کی گارمنٹس انڈسٹری میں ایک امید افزا کیریئر کے لئے تیار ہیں۔ گوادر پرو کے مطابق یہ فیکٹری چین کے بیلٹ اینڈ روڈ انیشی ایٹو(بی آر آئی)کے ایک حصے کے طور پر شروع کی گئی تھی تاکہ فائدہ اٹھانے والے ممالک میں صنفی مساوات اور خواتین کو بااختیار بنانے پر اثر انداز کیا جاسکے۔ گوادر پورٹ پر ایک چینی عہدیدار نے کہا یہ فیکٹری بین الاقوامی قانون کے مطابق بی آر آئی فریم ورک کے تحت خواتین کو مرکزی دھارے میں لانے اور بااختیار بنانے کے چین کے وعدوں سے مطابقت رکھتی ہے۔گوادر پرو کے مطابق یہ سہولت ضروری سلائی آلات سے لیس ہے اور اس میں پیداواری صلاحیت کے لئے سازگار ماحول ہے ، جس میں اچھی طرح سے روشن ماحول ، ایک مینجمنٹ روم اور ایک اسٹور شامل ہے۔ غیر ہنرمند خواتین کو تربیت کے مواقع فراہم کرنے اور نیم ہنر مند درزیوں کو عصرحاضر کے معیارکے مطابق اپنی صلاحیتوں کو نکھارنے کی اجازت دینے کے لئے یہ کمیونٹی میں ایک مرکزی نقطہ بن گیا ہے۔

کریڈٹ: انڈیپنڈنٹ نیوز پاکستان-آئی این پی