اسلام آباد ہائیکورٹ کے حکم پر وفاقی پولیس کے ڈی ایس پی سمیت 11 اہلکاروں کیخلاف مقدمہ درج کرلیا گیا ۔ شہریوں کو حبس بے جا میں رکھ کر تاوان مانگنے والاوفاقی پولیس کا افسر قانون کی پکڑ میں آگیا۔ اسلام آباد پولیس کے ڈی ایس پی فیاض رانجھا نے اپنے دیگر ساتھی اہلکاروں کے ساتھ مل کرفیصل آباد کے رہائشی سیف الرحمن، مزمل اور دیگرفیملی ممبرز کو حبس بے جا میں رکھ کر تاوان مانگاتھا۔ ملزمان کے خلاف اسلام آباد ہائیکورٹ میں مقدمہ زیرسماعت تھا جس میں اسلام آباد ہائیکورٹ نے حکم دیا کہ وفاقی پولیس کے افسر ڈی ایس پی فیاض رانجھا سمیت 11 اہلکاروں کیخلاف ایف آئی اے میں مقدمہ درج کیا جائے ۔ وفاقی پولیس کے کانسٹیبل رانا تسنیم، عدیل احمد،محمد امجد،شکیل اختر،لیڈی کانسٹیبل مبین کوثر،عمر دراز اور 2 دیگر ملزمان کے نام مقدمے میں نامزد کئے گئے ہیں۔ اسلام آباد ہائیکورٹ کے حکم کے مطابق ایس ایس پی آپریشن ،ڈی ایس پی سی آئی اے کیخلاف بھی توہین عدالت کی کاروائی عمل میں لائی جائے گی۔

کریڈٹ: انڈیپنڈنٹ نیوز پاکستان-آئی این پی