پاکستان کے ڈومیسٹک کرکٹ اسٹرکچر میں ایک بار پھر تبدیلی کی گونج سنائی دینے لگی ہے ۔رپورٹ کے مطابق پاکستان کرکٹ بورڈ (پی سی بی) کے ٹاپ آفیشلز ڈومیسٹک کرکٹ سے سامنے آنے والے نئے ٹیلنٹ سے زیادہ خوش نہیں ہیں۔ذرائع کے کا کہنا ہے کہ ڈائریکٹر ڈومیسٹک کرکٹ عبداللہ خرم نیازی اور سینئر جی ایم جنید ضیا سے ٹاپ مینجمنٹ خوش نہیں لیکن فی الحال دونوں کی ملازمتیں بچ گئی ہیں، گزشتہ دنوں ڈومیسٹک کرکٹ میں اصلاحات کیلئے ایک کمیٹی تشکیل دی گئی تھی جس میں عبداللہ اور جنید دونوں ہی شامل نہیں تھے، یہ ان پر عدم اعتماد کا واضح ثبوت تھا۔حال ہی میں عبوری ہیڈ کوچ کی ذمہ داری سے الگ ہونے والے عاقب جاوید اور وہاب ریاض کے سوا دیگر نان کرکٹرز بلال افضل (ایڈوائزر ٹو چیئرمین )، سمیر سید (سی او او) اور خواجہ ندیم (صدر آر سی اے لاہور) اس کمیٹی میں شامل ہیں، انہیں 5 ورکنگ دنوں میں رپورٹ چیئرمین کے پاس جمع کرانے کی ہدایت دی گئی تھی۔ذرائع نے مزید کہا ہے کہ جائزے کے کام میں عاقب جاوید پیش پیش رہے، وہاب ریاض کو اپنے دوست سلمان بٹ سے بھی مشورے ملتے رہے، اب ڈومیسٹک کرکٹ میں ایک بار پھر ٹیموں کی تعداد 18 سے کم کر کے 9 کرنے پر غور کیا جانے لگا ہے اور اس حوالے سے جلد کوئی فیصلہ متوقع ہے۔اعلی حکام کم ٹیلنٹ لیکن مگر کوالٹی کرکٹ کے حق میں ہیں تاکہ اس سے سامنے آنے والا ٹیلنٹ قومی ٹیم کی نمائندگی کے اہل ہو۔

کریڈٹ: انڈیپنڈنٹ نیوز پاکستان-آئی این پی