شمالی غزہ میں اقوام متحدہ کی امداد کے منتظر نہتے شہریوں پر اسرائیلی فائرنگ میں کم از کم 67 ا فلسطینی شہید ہوگئے جبکہ حماس نے غزہ کے علاقے خان یونس میں اسرائیلی فوج کے کانوائے پر حملہ کیا جس کے نتیجے میں متعدد اسرائیلی فوجی زخمی اور ٹینک تباہ ہوگئے۔ غزہ کی حماس کے زیرِ انتظام وزارت صحت کے مطابق اسرائیلی فوج نے شمالی غزہ میں اقوام متحدہ کی امداد کے منتظر شہریوں پر فائرنگ کی، جس کے نتیجے میں کم از کم 67 افراد جاں بحق ہو گئے ۔اقوام متحدہ کے عالمی ادارہ خوراک نے کہا کہ اس کا 25 ٹرکوں پر مشتمل قافلہ جب اسرائیل سے غزہ میں داخل ہوا اور چیک پوسٹوں کو عبور کیا، تو بھوک سے نڈھال عوام کا ایک بہت بڑا ہجوم اس کے سامنے آ گیا، جس پر فوری بعد فائرنگ شروع ہو گئی۔اسرائیلی ڈیفنس فورسز کا کہنا ہے کہ اس نے فوری خطرے کو ہٹانے کے لیے فائرنگ کی۔ فوج نے رپورٹ کیے گئے جانی نقصان کے اعداد و شمار کو چیلنج کیا ہے۔ دوسری جانب حماس نے غزہ کے علاقے خان یونس میں اسرائیلی فوج کے کانوائے پر حملہ کیا جس کے نتیجے میں متعدد اسرائیلی فوجی زخمی اور ٹینک تباہ ہوگئے۔ جبکہ حماس کا کہنا ہے کہ اسرائیل غزہ میں ایک سسٹم کے تحت نسل کشی کر رہا ہے۔ بھوک اور پیاس سے ستر فلسطینی بچوں کی اموات انسانیت کیلئے لمحہ فکریہ ہے۔

کریڈٹ: انڈیپنڈنٹ نیوز پاکستان-آئی این پی