کراچی میں فائرنگ اور پرتشدد واقعے میں 2 افراد جاں بحق ہوگئے۔پولیس کے مطابق ڈرگ روڈ کے قریب گھر سے نوجوان کی گولی لگی لاش ملی جس کی شناخت ارتضی علی کے نام سے ہوئی۔پولیس کا کہنا ہے کہ مقتول نے پسند کی شادی کی تھی، مقتول اپنے سسرال آیا ہوا تھا، ممکنہ طور پر قتل غیرت کے نام پر ہوا تاہم مزید تفتیش جاری ہے۔ادھر سپر ہائی وے جنجال گوٹھ میں نامعلوم افراد نے چھری کے وار سے 40 سال کے وحید اللہ کو قتل کردیا ، مقتول کا تعلق اپر دیر سے تھا اور ابتدائی تفتیش میں واقعہ ذاتی دشمنی کا نتیجہ معلوم ہوتا ہے۔دوسری جانب جوہر موڑ کے قریب فائرنگ سے 19 سال کی لڑکی ایمن نامی زخمی ہوئی جب کہ شاہ فیصل کالونی میں ڈکیتی مزاحمت کے دوران ڈاکوں کی فائرنگ سے 25 سال کا شہروز نامی نوجوان زخمی ہوا۔گلشن حدید میں بھی ڈکیتی مزاحمت پر 45 سالہ خالد نامی شخص ڈاکوئوں کی فائرنگ سے زخمی ہوا ، پاک کالونی میں نامعلوم سمت سے گولی لگنے سے حسن الہی نامی شخص زخمی ہوا جب کہ رات گئے فیڈرل بی ایریا بلاک 15 ، ڈیفنس فیز ایٹ اور لیاری بغدادی میں3 مبینہ پولیس مقابلوں کے دوران پولیس نے 4 زخمیوں سمیت 5 ڈاکوئوں کو اسلحہ ، موبائل فونز اور موٹر سائیکل سمیت گرفتار کیا۔

کریڈٹ: انڈیپنڈنٹ نیوز پاکستان-آئی این پی