سینئر اداکارہ فضیلہ قاضی نے پاکستانی ڈراموں پر کڑی تنقید کرتے ہوئے کہا ہے کہ ڈراموں میں غیر حقیقی خواب دکھائے جا رہے ہیں، حقیقت میں ہر غریب لڑکی کو امیر لڑکا نہیں ملتا۔ ایک انٹرویو کے دوران فضیلہ قاضی کا کہنا تھا کہ ڈراموں کے ذریعے معاشرے کے معصوم لوگوں کے ذہنوں کو خراب کیا جا رہا ہے کیونکہ ہمارے معاشرے میں زیادہ تر لوگ درمیانے طبقے سے تعلق رکھتے ہیں۔انہوں نے کہا کہ ڈراموں کے ذریعے اس طبقے کو نہ پورے ہونے والے خواب دکھائے جا رہے ہیں، عام طور پر نہیں ہونے والی چیزوں کو ڈراموں میں ایسے پیش کیا جا رہا ہے جیسے وہ حقیقت میں اسی طرح ہوتی ہیں۔اداکارہ کے مطابق ڈراموں میں دکھایا جاتا ہے کہ ایک غریب گھر کی لڑکی آفس جاتی ہے جہاں اس کی ملاقات ایک امیر لڑکے سے ہوتی ہے، دونوں میں محبت ہو جاتی ہے اور پھر شادی ہو جاتی ہے، حالانکہ حقیقت میں ایسا نہیں ہوتا۔انہوں نے مزید کہا کہ ڈراموں میں غلط تصورات دکھائے جا رہے ہیں، لوگوں کو خواب بیچے جا رہے ہیں تاکہ ڈراموں کی ریٹنگز بہتر ہوں، اس وجہ سے ڈراما انڈسٹری اپنی ذمہ داریوں کو بھی نظر انداز کر رہی ہے۔

کریڈٹ: انڈیپنڈنٹ نیوز پاکستان-آئی این پی