امیر جماعت اسلامی پاکستان حافظ نعیم الرحمن نے کہا ہے کہ راولپنڈی معاہدے پر عمل درآمد کرائیں گے اور ایک ایک دن گن رہے ہیں، اسٹیبلشمنٹ کے گملوں میں پلنے والوں نے ملک تباہ اور معیشت کا بیڑہ غرق کیا۔ جاری بیان میں حافظ نعیم الرحمن نے کہا کہ یہ اقتدار کے لیے اسٹیبلشمنٹ سے ڈیل کرتے اور نہ ملے تو برا بھلا کہنا شروع کر دیتے ہیں۔انہوں نے کہا کہ یہ نظام بوسیدہ اور مکڑی کے جالے کی طرح کمزور ہے، نوجوان نکلیں گے تو سب کچھ بہا لے جائیں گے۔حافظ نعیم الرحمن نے کہا کہ راولپنڈی معاہدے پر عمل درآمد کرائیں گے اور ایک ایک دن گن رہے ہیں، حکومت کا تعاقب کریں گے اور عوام کو حق دینا ہوگا۔ جماعت اسلامی کے پاس ہڑتالوں اور بجلی بلوں کے بائیکاٹ سمیت کئی آپشن موجود ہیں۔امیر جماعت اسلامی کا کہنا تھا کہ پورے پاکستان کے لیے بجلی ٹیرف میں کمی کی جائے، لاگت کے مطابق بجلی کی قیمت ہونی چاہیے، تنخواہ داروں پر ناجائز ٹیکس ختم کیا جائے جبکہ حکومت نے جو تاجر اور تجارت دشمن سکیم متعارف کرائی، اسے واپس لیا جائے۔

کریڈٹ: انڈیپنڈنٹ نیوز پاکستان-آئی این پی