امریکا کے 5 بڑے خبر رساں اداروں نے پینٹاگون کی جانب سے جاری کردہ نئے ضوابط پر سخت تشویش کا اظہار کرتے ہوئے انہیں مسترد کر دیا ہے۔اے بی سی، سی بی ایس، سی این این، این بی سی اور فاکس نیوز نے ایک مشترکہ بیان جاری کیا ہے جو سی این این کمیونیکیشن کے سوشل میڈیا اکائو نٹ پر شیئر کیا گیا۔ان اداروں کا کہنا ہے کہ یہ نئے تقاضے صحافیوں کی ملک اور دنیا کو اہم قومی سلامتی کے مسائل کے بارے میں باخبر رکھنے کی صلاحیت کو محدود کر دیں گے۔اداروں نے نئے پالیسی کو صحافت کے بنیادی تحفظات کیلئے خطرہ قرار دیا۔بیان میں کہا گیا ہے کہ ' آج ہم دیگر اداروں کے ساتھ شامل ہو کر پینٹاگون کے نئے ضوابط کو قبول کرنے سے انکار کرتے ہیں، جو صحافیوں کی ملک اور دنیا کو اہم قومی سلامتی کے مسائل سے باخبر رکھنے کی صلاحیت کو محدود کر دیں گے۔خبر رساں اداروں نے مزید کہا کہ وہ ایک آزاد اور خودمختار پریس کے اصولوں کو برقرار رکھتے ہوئے امریکی فوج کی کوریج جاری رکھیں گے اور کسی صورت آزاد اور خودمختارصحافت کے اصولوں پر سمجھوتہ نہیں کیا جائے گا۔

کریڈٹ: انڈیپنڈنٹ نیوز پاکستان-آئی این پی