ڈیرہ مراد جمالی میں منگولی تھانے کی حدود میں نامعلوم افراد نے چلتی گاڑی پر اندھا دھند فائرنگ کر دی جس کے نتیجے میں گاڑی میں سوار دو افراد موقع پر ہی جاں بحق ہو گئے، واقعے سے علاقے میں خوف و ہراس پھیل گیا ۔پولیس کے مطابق جاں بحق افراد کی شناخت شبیر ہجوانی اور ریاض ہجوانی کے نام سے ہوئی ہے۔ واقعے کے بعد حملہ آور جائے وقوعہ سے فرار ہو گئے۔واقعے کی اطلاع ملتے ہی منگولی تھانے کی پولیس ٹیم موقع پر پہنچ گئی اور شواہد اکٹھے کیے۔ دونوں لاشوں کو سول اسپتال منتقل کیا گیا جہاں ضروری کارروائی کے بعد انہیں ورثا کے حوالے کر دیا گیا۔پولیس نے واقعے کی تحقیقات شروع کر دی ہیں اور ملزمان کی تلاش جاری ہے۔ فائرنگ کی وجوہات تاحال سامنے نہیں آ سکیں۔

کریڈٹ: انڈیپنڈنٹ نیوز پاکستان-آئی این پی