معروف اداکار و ٹی وی میزبان جگن کاظم نے اداکارہ علیزے شاہ کے حق میں آواز بلند کرتے ہوئے کہا کہ خدارا، ایک دکھی دل پر اور وار نہ کریں، علیزے شاہ ٹراما سے گزر رہی ہے، اسے ٹرول نہ کریں۔ جگن کاظم نے حال ہی میں اداکارہ علیزے شاہ کی حمایت میں ایک ویڈیو پیغام جاری کرتے ہوئے علیزے شاہ کے ساتھ اپنے جذبات کا اظہار کرتے ہوئے کہا کہ میری معافی پر علیزے کا جواب بہت مثبت تھا، میں اس کی چیٹ کے اسکرین شاٹس تو نہیں شیئر کر سکتی، لیکن وہ بہت دعائیں دینے والی اور حساس انسان ہے۔ انہوں نے کہا کہ علیزے اس وقت شدید ذہنی دبائو اور جذباتی تکلیف کا شکار ہے اور ہم اسے مزید ٹرول کر رہے ہیں؟ وہ ابھی جوان ہے، پرانے زخم پھر سے ہرے ہو رہے ہیں، اسے ہر وہ لمحہ یاد آتا ہے جب اسے مارا گیا، مذاق اڑایا گیا یا نشانہ بنایا گیا۔ جگن نے سوشل میڈیا صارفین کو تنقید کا نشانہ بناتے ہوئے مزید کہا کہ کیا آپ واقعی اتنے فارغ ہیں کہ کسی کی پروفائل ڈھونڈیں، اس پر نظر رکھیں اور اسے نشانہ بنائیں؟ خدارا، یہ رویہ چھوڑ دیں ہر شخص کی زندگی کا ایک ایسا پہلو ہوتا ہے جو وہ دنیا کو نہیں دکھا سکتا، اگر آپ خود کو بہتر سمجھتے ہیں تو ہی دوسروں کو ٹرول کریں۔

کریڈٹ: انڈیپنڈنٹ نیوز پاکستان-آئی این پی