گلوکار احمد جہانزیب نے ڈراما سیریل عشق مرشد کے مقبول گانے تیرا میرا ہے پیار امر سے متعلق پیدا ہونے والے تنازع پر خاموشی توڑتے ہوئے جویریہ سعود کے دعوے کی سچائی بیان کر دی۔ ایک ٹی وی پروگرام میں گفتگو کرتے ہوئے ان کا کہنا تھا کہ گلوکاری آسان کام نہیں بلکہ اس کے لیے برسوں کی محنت اور ریاضت درکار ہوتی ہے اور آواز کا بھی خاص خیال رکھنا پڑتا ہے۔ عشق مرشد کے گانے سے متعلق تنازع پر بات کرتے ہوئے انہوں نے وضاحت کی کہ یہ گانا انہوں نے خود لکھا تھا، تاہم وہ اکثر شاعری کے دوران اپنے اردگرد موجود افراد سے مشورہ ضرور لیتے ہیں کہ کوئی لائن مناسب ہے یا نہیں، لیکن اس مشورے سے کسی دوسرے کو کریڈٹ نہیں ملتا اور گانے پر انہوں نے تنہا محنت کی تھی۔ان کا یہ بھی کہنا تھا کہ گانے پر تنازع کے حوالے سے وہ تفصیل سے کسی دن گفتگو کریں گے اور اس وقت اس حوالے سے مزید بات نہیں کرنا چاہتے۔ انہوں نے گانے سے متعلق جویریہ سعود کے دعوے کے بارے میں کچھ نہیں کہا تھا۔خیال رہے کہ اکتوبر 2024 میں جویریہ سعود نے دعوی کیا تھا کہ عشق مرشد کے او ایس ٹی کی شاعری انہوں نے لکھی تھی، مگر انہیں اس کا کریڈٹ نہیں دیا گیا۔

کریڈٹ: انڈیپنڈنٹ نیوز پاکستان-آئی این پی