معروف اداکار علی عباس کا کہنا ہے کہ انہوں نے والد وسیم عباس کی دوسری شادی کے بعد پیش آنے والے حالات سے بہت کچھ سیکھا اور اسی لیے وہ خود ایک شادی میں خوش اور مطمئن ہیں۔ ایک پوڈ کاسٹ انٹرویو کے دوران علی عباس نے انکشاف کیا کہ جب ان کے والد اداکار وسیم عباس نے دوسری شادی کی، اس وقت ان کی عمر تقریبا 12 سال تھی، اس کے بعد والد ان کے لیے وقت نہیں نکال پاتے تھے اور والدہ بھی ڈپریشن کا شکار تھیں، جس وجہ سے انہیں اپنے چھوٹے بہن بھائیوں کا بہت خیال رکھنا پڑا۔انہوں نے کہا کہ اس تمام صورتحال میں ان کے اور ان کے والد کے درمیان فاصلے پیدا ہو گئے تھے لیکن بعد میں جب انہوں نے دو شادیوں کے بعد اپنے والد کی حالت دیکھی تو انہیں اندازہ ہوا کہ اصل متاثرہ فرد تو ان کے والد تھے۔ان کا کہنا تھا کہ وہ اپنے والد کی پریشانیاں تو کم نہیں کر سکتے تھے لیکن انہیں سن ضرور سکتے تھے اور اسی دوران وہ اپنے والد کے ساتھ مزید قریب آ گئے۔علی عباس نے یہ بھی کہا کہ وہ خود ایک شادی سے خوش ہیں اور فی الحال دوسری شادی کا کوئی ارادہ نہیں رکھتے، والد کی زندگی دیکھنے کے بعد تو وہ شاید کبھی ایسا فیصلہ نہ کر سکیں۔

کریڈٹ: انڈیپنڈنٹ نیوز پاکستان-آئی این پی