نامور گلوکار و موسیقار بلال مقصود نے حکام سے معصوم بچوں پر زہریلا پینٹ کر کے انہیں دھوپ میں کھڑا کرنے کے رجحان کو روکنے کی اپیل کردی۔بلال مقصود نے سنہرے رنگ کے پینٹ لگے ہوئے بچے کی تصویر انسٹاگرام پر شیئر کی اور وزارت صحت کے نام پیغام تحریر کیا۔گلوکار نے کہا آپ کو اتحاد ڈیفنس اور سی ویو پر اس طرح کے بہت سے بچے ملیں گے، ان کے چہرے پر چمکدار پینٹ لگا ہوا ہوتا ہے، جو اس گرمی میں سڑکوں پر کھڑے رہتے ہیں۔بلال مقصود نے لکھا دل دہلا دینے والی بات یہ ہے کہ یہ پینٹ اکثر ایلومینیم پاڈر یا خطرناک کیمیکل سے بنایا جاتا ہے، جو کہ انتہائی نقصان دہ ہوتا ہے، دیر تک ایسے سورج کے نیچے کھڑے رہنے سے جلد کے سنگین مسائل پیدا ہو سکتے ہیں اور یہاں تک کہ جلد کا کینسر بھی ہو سکتا ہے۔انہوں نے کہا کچھ کرنے کی ضرورت ہے، براہ کرم اس پر نظرِ ثانی کریں، ان بچوں کو تعلیم دیں اور ان کی حفاظت کریں اس سے پہلے کہ بہت دیر ہو جائے۔خیال رہے کہ کراچی کی چند مشہور شاہراہوں جیسے راشد منہاس روڈ، بلوچ کالونی، شہید ملت، عائشہ منزل اور سی ویو وغیرہ پر کچھ بچوں کو سلور اور گولڈن پینٹ کرکے کھڑا کر دیا جاتا ہے جنہیں لوگ پیسے دیتے ہیں۔

کریڈٹ: انڈیپنڈنٹ نیوز پاکستان-آئی این پی