اداکارہ حبا بخاری نے جعلی ایکس (سابقہ ٹوئٹر) اکائونٹ کے ذریعے پھیلائی گئی غلط معلومات کی تردید کر دی۔ حبا بخاری نے ایک جعلی ایکس اکائونٹ کی جانب سے ان سے منسوب کیے گئے متنازع بیان پر ردعمل دیتے ہوئے وضاحت کی ہے کہ ان کا ٹوئٹر پر کوئی آفیشل اکائونٹ موجود نہیں۔سوشل میڈیا پر ایک اکائونٹ نے سابق وزیراعظم عمران خان سے متعلق ایک بیان حبا بخاری کے نام سے شیئر کیا، جس کے بعد صارفین کی جانب سے ملا جلا ردعمل سامنے آیا۔حبا بخاری نے انسٹاگرام اسٹوری کے ذریعے اپنے مداحوں کو آگاہ کیا کہ وہ ٹوئٹر پر سرے سے موجود ہی نہیں ہیں اور ان کے نام سے بنایا گیا اکائونٹ جعلی ہے۔ انہوں نے مداحوں سے درخواست کی کہ ایسے جعلی اکائونٹس کو فوری طور پر رپورٹ کریں تاکہ غلط معلومات کے پھیلائو کو روکا جا سکے۔اداکارہ نے مزید کہا کہ کسی بھی سماجی یا سیاسی معاملے پر ان کے نام سے کیے جانے والے بیانات کو سنجیدگی سے نہ لیا جائے، جب تک کہ وہ خود اپنے آفیشل پلیٹ فارمز پر کوئی بات نہ کریں۔ حبا بخاری کی اس وضاحت کے بعد مداحوں میں غلط فہمی دور ہو گئی ہے۔

کریڈٹ: انڈیپنڈنٹ نیوز پاکستان-آئی این پی