ممتاز سینئر اداکار فردوس جمال نے موسیقی بارے اپنے خیالات کا اظہار کیا ہے۔ فردوس جمال نے حال ہی میں ایک پوڈکاسٹ میں موسیقی اور مذہب کے حوالے سے کہا کہ اگرچہ موسیقی پر تنقید کی جاتی ہے، لیکن یہ آسمانوں کی زبان ہے اور جنت میں بھی موسیقی سننے کو ملے گی تاکہ روح کو سکون پہنچے۔انہوں نے معاشرتی رویوں پر تنقید کرتے ہوئے کہا کہ ہم موسیقی سے محبت تو کرتے ہیں، مگر اگر کوئی گلوکار بن جائے تو اسے کم تر سمجھتے ہیں اور اس پر تنقید کرتے ہیں۔انہوں نے اس رویے کومنافقت قرار دیتے ہوئے کہا کہ نعت خوانی، اذان اور قرآت میں بھی مخصوص راگ اور سر استعمال کیے جاتے ہیں اور یہی چیز ان کی تاثیر میں اضافہ کرتی ہے۔فردوس جمال کا کہنا تھا کہ موسیقی پر بات کرنا ہمارے معاشرے میں ممنوع سمجھا جاتا ہے، حالانکہ اس میں خوبصورتی اور روحانیت دونوں موجود ہیں۔ تاہم سوشل میڈیا پر کئی صارفین سینئر اداکار کی جانب سے دیئے گئے موسیقی کو اسلام سے جوڑنے کے بیان پر انہیں تنقید کا نشانہ بنا رہے ہیں۔
کریڈٹ: انڈیپنڈنٹ نیوز پاکستان-آئی این پی