معروف اداکارہ، ماڈل اور اینکر مشی خان نے جو سماجی اور سیاسی مسائل پر کھل کر بات کرتی ہیں، اس بار پاکستانی شوبز شخصیات پر برس پڑیں۔یہ ردعمل اس وقت سامنے آیا جب بھارتی مقبوضہ کشمیر کے علاقے پہلگام میں دہشت گرد حملے پر پاکستانی شوبز سٹارز کی طرف سے مذمتی بیان دیئے گئے۔ مشی خان نے انسٹاگرام پر ایک ویڈیو کے ذریعے ان فنکاروں کو تنقید کا نشانہ بنایا۔ ان کا کہنا تھا، جان و مال کا نقصان جہاں بھی ہو، افسوسناک ہے، مگر جب پاکستان میں حملے ہوتے ہیں تو یہی فنکار کیوں خاموش رہتے ہیں؟انہوں نے خاص طور پر فواد خان، ہانیہ عامر اور دیگر مشہور ستاروں کا ذکر کرتے ہوئے کہا،بھارتی میڈیا پھر سے پاکستان پر الزام لگا رہا ہے، اور ہمارے لوگ فورا مذمتی پوسٹس ڈال رہے ہیں۔ عزت نفس کہاں گئی؟ جب ہم پر الزام لگتا ہے تو ہمیں بھی کرکٹ اور دیگر سرگرمیاں روک دینی چاہئیں۔مشی خان نے پاکستانی مشہور شخصیات سے درخواست کی کہ کچھ وقار پیدا کریں اور اپنے ملک کے لیے بھی کھڑے ہونا سیکھیں۔

کریڈٹ: انڈیپنڈنٹ نیوز پاکستان-آئی این پی