معروف گلوکار و اداکار علی ظفر نے امید ظاہر کی ہے کہ آنے والی نسل پاکستان اور بھارت کے درمیان امن کا انتخاب کرسکتی ہے۔ اداکار نے سماجی رابطے کی ویب سائٹ ایکس پر چیئرمین پی پی پی بلاول بھٹو زرداری کا بھارتی صحافی کرن تھاپڑ کو دیے گئے انٹرویو کا مختصر ویڈیو کلپ ری شیئر کیا۔مذکورہ ویڈیو کلپ کو علی ظفر نے ری شیئر کرتے ہوئے کہا، جو بھی بلاول بھٹو زرداری نے کرن تھاپڑ کے انٹرویو میں کہا وہ مجھے بہت پسند آیا۔گلوکار نے دونوں حریف ممالک کے درمیان نسل در نسل چلی آ رہی نفرت و جنگ ختم ہونے کی امید ظاہر کی اور کہا کہ جیسے جیسے ہم بیداری اور ذہانت کے نئے دور میں داخل ہو رہے ہیں، پرانے طریقے اپنی گرفت کھو رہے ہیں اور وہ دن دور نہیں جب اس سرزمین کے بچے پوچھیں گے، کیا یہ سچ ہے کہ بھارت اور پاکستان کبھی دشمن تھے؟ وہ ہم سے سوال کریں گے کہ کیا ہم ایک دوسرے سے مل بھی نہیں سکتے تھے؟ کیوں ہم نے ایک دوسرے کو گلے لگا کر اور بات چیت کے ذریعے اپنے مسائل کو حل نہیں کیا؟ اتنی گہری نفرت کرنا کیسے سکھایا؟انہوں نے امید ظاہر کی کہ یہ نسل امن کا انتخاب کر سکتی ہے اور یہ خوبصورت ہوسکتا ہے۔
کریڈٹ: انڈیپنڈنٹ نیوز پاکستان-آئی این پی